पाचवेचार वाठार राखप आमची लागणूक

भांगरभूंय | प्रतिनिधी

डॉ. सावंत : गरजेचे कायदे, सुदारणा करपाची घोशणा

भांगरभूंय । प्रतिनिधी

पणजी : गोंयच्या पाचवेचार वाठाराची राखण करप ही आमची लागणूक. ते राखून दवरपा खातीर आमी गरजेचे कायदे आनी सुदारणा अंमलात हाडटले. तशेंच गोंयची जैवविविधताय राखून दवरपा वांगडाच तांचो आस्वाद घेवप हे तितलेच गरजेचें, अशें मुख्यमत्री डॉ. प्रमोद सावंत हांणी सांगलें.

कापांल पणजे हांगासर गोंय रान उदरगत म्हामंडळान घडोवन हाडिल्ल्या गोंय रान विविधताय महोत्सवाच्या उक्तावणा वेळार मुख्यमंत्री उलयताले. ह्या वेळार केंद्रीय मंत्री श्रीपाद नायक, रानां मंत्री विश्वजीत राणे, पर्यटन मंत्री रोहन खंवटे, राज्यसभा खासदार सदानंद शेट तानावडे, गोंय रान उदरगत म्हामंडळाची अध्यक्ष देविया राणे आनी हेर मानेस्त उपस्थीत आशिल्ले.

ह्या वेळार गोंयच्या घसघश्या विशींचो म्हायतीपट आनी गोंयच्या रानांतल्यो पाककृती हें कॉफी टेबल पुस्तक उजावाडाक हाडलें.

रान विविधताय महोत्सवात जन, जंगल आनी जमीन ह्या तीन गजालींचो आस्पाव आसा. हें राखून दवरपा खातीर रानां मंत्रालय तशेंच रान खात्यान जापसालदारकी घेतल्या आनी आमी ताचेर काम करतात. ते खातीर आमी कायदो आनी दुरुस्त्यो हाडपाचो विचार करचे नात. दर्यादेगे वांगडा गोंयचो पाचवेचार वाठारांचें संवर्धन जावप हें तितलेंच गरजेचें, अशें मुख्यमंत्र्यान सांगलें.

गोंयांत 6 अभयारण्यां आनी 1 राष्ट्रीय बाग आसा. हें सगलें पळोवप, तें अणभवप ही काळाची गरज आसा. देशांत सगल्यांत गिरेस्त जैवविधताय म्हणटा ती गोंयच्या अस्तंत घांटांनी आसा. हें जैवविधतायेचें संवर्धन करचे वांगडा तांचो आस्वाद घेवपाक जाय. पुर्नरूजीवन पर्यटन हे संकल्पने खाला आमी इको पर्यटनाक उर्बा दितले. जे वरवीं गोंयांत येवपी पर्यटक हो रानांक भेट दितलो, अशी म्हायती मुख्यमंत्र्यान दिली. गोंयची रान पाकृकती ह्या पुस्तकांतल्यान गोंयचीं आदलीं खाणां-जेवणा कितें आशिल्लीं, गोंयांत पयलीं कशे रांदताले हे गजालींचेर उजवाड घालता. हे संकल्पने खातीर हांव देविया राणे हांणी फुडारपण खाला तयार केल्ल्या पंगडाची तोखणाय करता. गोंय सरकारा विविध महोत्सव देखीक काजू महोत्सव, अन्न महोत्सव, नुस्तें महोत्सव, वायन महोत्सव आनी सुकणीं महोत्सव घडोवन हाडटा. गोंयकारांनी ह्या महोत्सवांनी वांटेकार जावन ताचो आस्वाद घेवचो, असो उलो मुख्यमंत्र्यान मारलो.