भांगरभूंय | प्रतिनिधी
पणजी : विकसीत, पाचवेंचार, नितळ गोंयां खातीर क्रांतीची मशाल परत एक फावट पेटोवची. हें सपन पुराय करपा खातीर सगल्यांनी एकवटान काम करप गरजेचें, अशें मुख्यमंत्री डॉ प्रमोद सावंत हांणी म्हणलें. पणजे आझाद मैदानांत क्रांतिदिसा निमतान आयोजीत कार्यावळींत ते उलयताले.
ह्या वेळार राज्यपाल पी एस श्रीधरन पिल्लई, मंत्री सुभाष शिरोडकार, मंत्री सुदिन ढवळीकार, विरोधी पक्ष फुडारी युरी आलेमाव, सुटके झुजारी संघटणेचे अध्यक्ष रोहिदास देसाय आनी हेर अधिकारी हजर आशिल्ले.
डॉ. राम मनोहर लोहिया हांणी १९४६ वर्सा गोंयांत क्रांतीची वात पेटयली. भारत स्वतंत्र जाले उपरांत गोंय मुक्त जावपाक १४ वर्सां लागलीं. हीं १४ वर्सां गोंयची उदरगत जावपा पसून फाटींच उरिल्लें. मात डबल इंजिन सरकाराक लागून फाटलीं स वर्सां गोंयांत दोळे दिपकावपी उदरगतीचीं कामां जाल्यांत. आयज गोंय मुळाव्यो सुविधा, उदरगतीच्या कामांत देशांत मुखार आसा. एका अर्थान डॉ. लोहिया वा स्वातंत्र्य सैनिकांनी गोंयां खातीर पळयिल्लीं सपनां आतां पुराय जातात, अशें मुख्यमंत्र्यान म्हणलें.
सरकारान मुळावी उदरगत केल्या. आतां आमकां मुखार उदरगत करपाची आसा. केंद्र सरकाराचे १३ फ्लॅगशिप प्रकल्प पुराय करपाकूय गोंय देशांत मुखार आसा. गोंयांत गुन्यांवांचो तपास पुराय करपाचेय टक्के बरे आसा. कायदो पळप ही सगल्या नागरिकांची जापसालदारकी. प्रधानमंत्री नरेंद्र मोदी हांणी विकसित भारत २०४७ चे लक्ष्य दवरलां. आमकां ताचे पयलीं धा वर्सां म्हणल्यार २०३७ वर्सा हें ध्येय पुराय करपाचें आसा. विकसीत गोंय २०३७ खातीर जात, धर्म, राजकीय मतभेद विसरून एकठांय येवप गरजेचें, अशेंय तांणी मुखार म्हणलें.
इतिहास खबर आसप गरजेचें
आमचो इतिहास खबर आसल्यारूच वर्तमान आनी फुडार पर्जळटा. हे खातीर तरणाटे पिळगेक गोंयचो इतिहास खबर आसप गरजेचें. राज्य सरकारान गोंयच्या मुक्ती संग्राम विशीं एनिमेशन चित्रपट केला. हो चित्रपट येवपी १९ डिसेंबराक प्रदर्शीत करतले.
लोहियांचीं पुस्तकां उपलब्ध करतले
राज्यपाल पिल्लई हांणी सांगलें, राज्यांतले तरणाटे पिळगेक राम मनोहर लोहिया, दीनदयाळ उपाध्याय हांचो इतिहास खबर आसप गरजेचें. राज्यांतल्या कांय वाचनालयांनी राम मनोहर लोहिया हांचीं पुस्तकां नात. आमी बेगीनूच हीं पुस्तकां विकत घेवन वाचनालया खातीर उपलब्ध करून दितले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
