पाकिस्तान शाणो जातलो ??

भांगरभूंय | प्रतिनिधी

पाकिस्तानी लश्कर आनी सरकारांतले कांय लोक ह्या आतंकवाद्यां वटेन आसात. धर्माक मारिल्ली वेंग चड घट करप धोक्याचें थारतलें.

प्रधानमंत्री नरेंद्र मोदी हांणी पाकिस्तानाक काल कोडू कसाय दिलो. पूण, तरीय पाकिस्तानी सुदारतले अशी आस्त आमी भारतीयांनी ना दवरिल्ली बरी. हाचे मुखार आमच्या राखणे दळांक आनीक सादूर रावचें पडटलें. कारण आतां मेरेनचो इतिहास पळयल्यार पाकिस्तान सुदारत अशें दिसना. सुण्याची शेंपडी एक वेळ नळयेंत घालिनासतना सरळ जायत, पूण न्हय पाकिस्तान. कांय जाणांच्या मतान थंय आतंकवादी तयार जावपा फाटल्यान कांय कारणां आसात. अमेरिके सारक्या देशांनी पयलीं सावन विवीध कारणांक लागून इस्लामी राष्ट्र्रांचेर हल्ले केल्यात. इराक, अफगाणिस्तान हीं ताचीं उदाहरणां. तातूंत इझ्रायल आमची भूंय बळकावन आमचेच आड आगळिको करता, अशें अरब राष्ट्रांचें म्हणणें. असाक्षरताय, गरिबी, दळडीर, बेरोजगारी ह्या कारणांक लागूनय शेंकड्यांनी तरणाटे आतंकवादा कडेन वळत आसात. धर्मीक गुळयो दिवन मेंदूक बंद केलो काय तरणाट्यांचो वापर आतंकवादा खातीर सहज करपाक मेळटा. तरणाट्यांची दिशाभूल करप, तांच्या राष्ट्रवाद, धर्मवाद, जातीय- प्रांतीय अहंकाराक सारें- उदक घालून तांकां चुकीच्या मार्गाचेर व्हरप… 5- 10 लाख रुपयां खातीर कितलेशेच गरीब तरणाटे कंबराक बाॅम्ब बांदून मेल्यात. ‘हम तो डूबेंगे सनम, तुम्हें भी ले डूबेंगे’ वृत्तीच्या पाकिस्तानाक भारतांत लोकशाय नंदता, उदरगत जाता, हें पळोवं नज जालां. देखून तो आमकां दुबळो करपाक सोदता, पूण हें करतना तो भारत वा अमेरिके कडल्यान एक दीस मातयेभरवण जातलो, हें निश्चीत. ताचे पयलीं थंयच्या सरकारांनी आनी लश्करान आतंकवाद्यांचें पेंगट मोडचें, नाजाल्यार….. भविश्य सांगपाक ज्योतिश्याची गरज ना.
पाकिस्तान भारताची कुरापत काडटा वा आतंकवाद्यांक दुडू दिवन भारतांत धाडटा, हें आतां लिपून उरूंक ना. भारतान पाकिस्तानाचे विनवणे वयल्यान फक्त लश्करी कारवाय मुखार धुकळ्ळ्या. पाकिस्तानाचो दृश्टिकोन पळोवन फुडले कारवायेचो निर्णय घेतले. लश्कर सज्ज आसा, अशें प्रधानमंत्री मोदी हांणी म्हणलां. हाचे मुखार भासाभास फक्त आतंकवाद आनी पीओकेचेरूच जातली. आकांतवादा आड शुन्य सोंशिकसाण दाखोवप ही बऱ्या संवसाराची हमी. जे पद्दतीन थंयचें लश्कर आनी सरकार आकांतवादाक उर्बा दिता, तें पळयल्यार एक दीस ते पाकिस्तानूच नश्ट करतले, अशें मोदी हांणी सांगलें. हातूंत तथ्य आसा. हे आतंकवादी समांतर सरकार चलयिल्ले भशेन वागपाक लागल्यात. कांय वेळार पाकिस्तानी सरकार आनी लश्करूय तांचे मुखार असहाय्य जाल्लें दिसलां. आतंकवादी तांचेच तकलेक मिरयां वाटपाक लागल्यात. 16 डिसेंबर 2014 दिसा पेशावरांत वर्गा- वर्गांनी भोंवत आतंकवाद्यांनी 145 भुरग्यांक जिवेशीं मारिल्लीं. तेहरिक ए तालिबान पाकिस्तानान हें कृत्य केल्लें. पूण तेन्ना सावन आयज मेरेन आतंकवाद्यांचे अड्डे काबार करपाचे थंय यत्न जावंक नात. उरफाटे पयर भारताच्या हल्ल्यांत मेल्ल्या आतंकवाद्यांच्या मरणाक व्हडले फुडारी, लश्करी अधिकारी हाजीर आशिल्ले. पाकिस्तानी लश्कर आनी सरकारांतले कांय लोक ह्या आतंकवाद्यां वटेन आसात. धर्माक मारिल्ली वेंग चड घट करप धोक्याचें थारतलें. आकारान, लोकसंख्येन पाकिस्तान भारता परस ल्हान, पूण अजून उदरगत जावंक ना. दोन कोटीं वयर भुरगीं अशिक्षीत आसात. तीं आतंकवादाच्या मळाचेर येवचीं नात, हे खातीर हो देश कितें करता? हाचे मुखार आतंकवाद्यांचे अड्डे काबार करचे. नवे आतंकवादी तयार जावचे नात, हे खातीर उपाय घेवचे.
पाकिस्ताना कडेन चर्चा जाली जाल्यार आतंकवादाचेरूच आसतली. आतंकवाद, वेपार एकठांय चलपाक शकना. उदक आनी रक्त एकठांय व्हांवपाक शकना, अशें मोदी हांणी स्पश्ट केलें तें बरें जालें. न्हंयांचें उदक पुरायेन बंद केल्यार पाकिस्तान वळवळटलो. तांचो वेपार बंद केलो जाल्यार भिकेक लागतलो, हाची जाणीव तांकां ना, हाका कितें म्हणचें? गजाली मात, अणुबाॅम्बाच्यो! आतां आंतरराष्ट्रीय नाणे निधीन (आयएमएफ) पाकिस्तानाक 1 अब्ज डाॅलर रीण दिलां? हो पयसो उदरगतीचेर खर्च जातलो काय आतंकवादाक पोसवण दिवपाक सोंपतलो, हाचो विचार आयएमएफान करपाक जाय आशिल्लो.
भारतीयांक शांतिकायेन जगपाक मेळचें, विकसीत भारताचें सपन पूर्ण जावचें हे खातीर भारत बळिश्ट आसप गरजेचें. तसो तो आसा. पाकिस्तानाक तें बेस बरें खबर आसा. तरीय तांणी आत्मपरिक्षण करून जाता तितले बेगीन स्वता सुदारपाची गरज आसा. काश्मिरांतली परिस्थिती निवळ्ळ्या. पूण घाळ रावन उपकारचें ना. कारण अफू परस खर आशिल्ली धर्माची गुळी घेतली काय कोण कितें करत तें सांगूंक जायना. आंतरराष्ट्रीय नियंत्रण रेशा, शिमांचेर कडक बंदोबस्त जाय. काश्मीरांतलें पर्यटन जाग्यार घालचें पडटलें. पाकिस्तान कुरापत काडपाचें धाडस करचो ना, पूण आतंकवाद्यांचें कांय सांगपाक येना. ते परत घुसपाक शकतात. भारतीय लश्कराक सगले अधिकार दिल्यात. तांचेर आतां व्हडली जापसालदारकी आसा. केंद्र सरकारानूय पाकिस्तानाचेर आंतरराष्ट्रीय पांवड्या वयल्यान चेंपण हाडचेंच, पूण तांचे कडेन आशिल्ले द्विपक्षीय संबंद तोडचे. आतंकवाद्यांचे वटेन रावल्यार कितें परिणाम जातात, तें तांकां कळुंदी.