भांगरभूंय | प्रतिनिधी
बलुचिस्तानान केली स्वातंत्र्याची घोशणा
भारत आनी यूएनओ कडेन तेंक्याची मागणी
बलुची लोकांनी दिला तांचो ‘राष्ट्रीय निर्णय’
खबरां संस्था
इस्लामाबाद : बलूच फुडारी मीर यार बलोच हांणी बुधवारा बलुचिस्तानाक पाकिस्ताना कडल्यान स्वातंत्र्य जाहीर केलें. तांणी हाचे फाटलें कारण म्हूण बलूच लोकां आड दसकां सावन चालू आशिल्ल्या मानवी हक्कांचें उल्लंघन, अपहरण आनी हिंसाचार हांचो उल्लेख केलो. मीर यार बलोच हांणी एक्सपोस्टांत म्हणलां, बलुचिस्तानाच्या लोकांनी तांचो ‘राष्ट्रीय निर्णय’ दिला आनी संवसारान आतां ओगी बसचें न्हय. आमचे मदीं वांटो घेयात. बलुचिस्तानी लोक रस्तार आसात. बलुचिस्तान हो पाकिस्तानाचो भाग न्हय. हो तांचो राष्ट्रीय निर्णय आसा आनी सावसार आतां मूक प्रेक्षक रावपाक शकना. तांणी बलुचिस्तानाच्या स्वातंत्र्या खातीर भारत आनी संवसारीक समुदाया कडल्यान मान्यताय तशेंच तेंको मागला.
मीर हांणी भारतीय माध्यमां, यूट्युबर्स आनी भारतीय बुद्धीजिवींक बलुचांक पाकिस्तानी लोक म्हणचें न्हय, असो उलो मारला. आमी पाकिस्तानी न्हय, आमी बलुची आसात. पाकिस्तानाचे स्वताचे लोक पंजाबी आसात, जांकां केन्नाच हवाई बॉम्बस्फोट, अपहरण वा नरसंहाराक फुडो करचो पडूंक ना. तांणी पाकव्याप्त जम्मी आनी काश्मीरा विशीं भारताचे भुमिकेचें समर्थन केलें. हो वाठार रितो करचे खातीर पाकिस्तानाचेर चेंपण हाडपाचो उलो तांणी आंतरराष्ट्रीय समुदायाक मारला.
भारत पाकिस्तानी सैन्याक हारोवपाक शकता. जर पाकिस्तानान लक्ष दिलें ना जाल्यार, पाकिस्तानी लश्कराच्या हावरट जनरलाकूच ह्या रक्तपाता खातीर जापसालदार धरचें पडटलें, कारण इस्लामाबाद पाकव्याप्त काश्मीरांतल्या लोकांचो ढाल म्हूण वापर करता, अशें मीर यार हांणी म्हणलें.
संवसारान बलुचिस्ताना वयले पाकिस्तानाचे दावे स्विकारचे न्हय. बलुचिस्तानाचेर परकी शक्तींचे मजतीन जबरदस्तीन कब्जो केला. बलुचिस्तानांत खूब काळा सावन मानवी हक्कांचें उल्लंघन चालू आसा. पाकिस्तानी सैन्य आनी पुलीस लोकांचेर हल्लो करतात. थंय विदेशी माध्यमां पावप खुबूच मर्यादीत आसात. ताका लागून बलुचिस्ताना कडेन संबंदी बातम्यो भायर येवपाक शकनात, अशें मीर यार हांणी सांगलें.
बीएलए नेमकी कितें?
बलूच लिबरेशन आर्मी (बीएलए) ही पाकिस्तानांतल्या बलुचिस्तान प्रांताच्या स्वातंत्र्या खातीर लडपी संघटणा आसा. ताची स्थापना 2000 च्या दसकांत सुरवात जाली आनी साबार देशांनी तिका आतंकवादी संघटणा म्हूण घोशीत केल्या. ही संघटणा पाकिस्तानी लश्कर, सरकार आनी सीपीईसी सारक्या चिनी प्रकल्पांक लक्ष्य करता. बीएलए तांचे गमिनी झुजा शैली खातीर वळखतात. म्हणल्यार दोंगराळ वाठारांत लिपून रावून सैन्याचेर हल्लो करप आनी रोखडेच थंयच्यान ना जावप.
बलूच संघर्शाची तुळा व्हिएतनाम चळवळी कडेन ?
पाकिस्तानाचे लश्कर मुखेली जनरल असीम मुनीर हांणी कांय दिसां आदीं एका निवेदनांत म्हणलां, बलुचिस्तानांत फक्त 1500 लोकां खातीर अशांतताय पातळ्ळ्या. ते लाखांनी संख्येन आशिल्ल्या पाकिस्तानाच्या वेवसायीक सैन्याचें कसलेंच लुकसाण करपाक शकना. ब्रिटीश मानवाधिकार कार्यकर्ते पिटर टॅचेल हांचो विस्वास आसा, पाकिस्तान बलुचिस्तानाचें स्वातंत्र्य मुखार व्हरपाक शकता, पूण सासणाचें आडावपाक शकना. तांणी बलूच संघर्शाची तुळा व्हिएतनामांतले चळवळी कडेन केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
