भांगरभूंय | प्रतिनिधी
खबरां संस्था
कराचीः वन-डे वर्ल्ड कपांतली भारत आनी पाकिस्तान हांचे मदली मॅच ही क्रिकेट सर्ती परस आमकां व्हडली न्हय. फकत भारताका हारोवप हें आमचें लक्ष्य आसचें ना. आनीक 8 देशांचे पंगड आसतले आनी तांका हारयलें तरच पाकिस्तान फायनलींत खेळपाक शकतलो अशें पाकिस्तान क्रिकेट पंगडाचो कॅप्टन बाबर आझमान सांगलां.
ह्या वर्ल्ड कपांत चॅम्पियन जावप हेंच आमचें लक्ष्य आसा.खंयचेय मैदान आसूं आमी खंयच्याय पंगडाक तोंड दिवपाक तयार आसात अशेंय ताणे सांगलां. वर्ल्ड कप क्रिकेट सर्तींत 5 ऑक्टोबराच्यान भारतांत सुरवात जातली आनी भारत- पाकिस्तान मॅच 15 ऑक्टोबराक अहमदाबादच्या नरेंद्र मोदी स्टेडियमाचेर जातली. आमी भारतांत वर्ल्ड कप खेळपाक येतले, फकत भारता आड खेळपाक न्हय. आमी कसलेय कंडीशनांत खेळपाक शकतात. सर्तींतले दरेका मॅची कडेन आमी एक आव्हान हेच नदरेंतल्यान पळयतले, आमचो फोकस फकत भारताचेर आसचो ना जाल्यार पुराय सर्तीचेर आसतलो. सगळ्या पंगडां कडेन खेळटना ती मॅच कशी जिखपाची हाचेर आमी विचार करतले अशें बाबरान सांगलां. वर्ल्ड कपा पयली पाकिस्तान पंगड श्रीलंकेचे भोंवडेर वतलो. सध्या ते खातीर पाकिस्तान पंगडाचो कराचींतल्या प्रशिक्षण कॅम्पांत सध्या सराव करता. ह्या वेळार बाबर आझम प्रसार माध्यमां कडेन उलयतालो.
पाकिस्तान सरकारान पाकिस्तान पंगडाक भारतांत वचपाक अजून परवानगी दिल्ली ना. मॅच खंयूय आनी खंयच्याय देशाचे पंगडा आड आसूं आमी सामके तयार आसात. आमी प्रोफेशनल क्रिकेट खेळटले. आंतरराष्ट्रीय पांवड्यार कसल्याय कंडिशनांत खेळपाक आमी तयार आसतात. पंगडांतलो एक खेळगडो आनी कॅप्टन म्हणून कसलेंच आव्हान स्विकारपाक हांव सदांच तयार आसता. कसलेय परिस्थितींत पाकिस्तान पंगड जिखतलो हें हांव पळयलां अशें ताणे सांगलां. बाबर आझम भारता आड 5 वन-डे मॅच खेळ्ळा आनी ताणे 158 धांवड्यो केल्यात. तातूंत ताकां अर्द शेंकडोय करपाक अजून जमल्लें ना. भारता आड ताणे 2019 वर्सा वन-डे वर्ल्ड कपांत आतां मेरन सगल्यांत चड 48 धांवड्यो केल्यात.
वर्ल्ड कपांत खेळपाक पाकिस्तान सरकारान अजून तांच्या पंगडाक भारतांत वचपाची परवानगी दिवंक ना. भारतांत ज्या मैदानार भारत- पाकिस्तान आनी हेर देशांच्या पंगडां आड मॅची जावपाच्यो आसात थंयची सुरक्षा वेवस्थेचो नियाळ घेवपा खातीर पाकिस्तानांतल्यान एख खाशेलो पंगड येवपाचो आसा. व्हो पंगड पाकिस्तान क्रिकेट मंडल. आंतरराष्ट्रीय क्रिकेट परिशद आनी भारतीय क्रिकेट नियामक मंडळाक आपलो अहवाल सादर करतलो ते उपरांत भारतांत पंगडाक धाडपाचें कांय ना हाचो निर्णय पाकिस्तान सरकार घेतलें.
आपले श्रीलंका भोंवडेन पाकिस्तान पंगड 16 जुलयाक गॉल हांगा पयली आनी 24 जुलयाक कोलंबोक दुसरी टॅस्ट खेळटलो. ते उपरांत व्हो पंगडा ऑस्ट्रेलिया (3 टॅस्ट) आनी दक्षीण आफ्रिकाचे (2 टॅस्ट) भोंवडेर वतलो. वेस्ट इंडिज आनी बांगला देश पाकिस्तान भोंवडेर वचून दरेकी दोन टॅस्ट मॅचींची माळ खेळटले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
