भांगरभूंय | प्रतिनिधी
अफगाणिस्तानाक आशिया करंड सर्तीचे सुपर चारांतले मॅचींत एके विकेटीन हारोवन पाकिस्तानान फायनलींतली सुवात निश्चीत केली. पाकिस्तानाक जैता खातीर निमाण्या स बॉलांनी 11 धांवड्यांची गरज आशिल्ली. तांणी फजहलहक फारुकीचे सुरवातीच्या दोन बॉलांचेर दोन सके मारून मॅच सोंपयली. ह्या जैता सयत पाकिस्तानान फायनलींतली सुवात निश्चीत केली. दुसरे वटेन हे हारीक लागून अफगाणिस्तानाचें आव्हान सोंपलें. तशेच भारताक लेगीत बिटकी कवळची पडली. अफगाणिस्तान जिखिल्लो जाल्यार भारताक लेगीत फायनलींत पावपाची आस्त कायम उरपाची. भारत आतां बिरेस्तारा अफगाणिस्ताना आड फक्त औपचारीक म्हणून मॅच खेळटलो.
ते आदीं टॉस हारल्या उपरांत पयलीं बॅटींग करतना अफगाणिस्तानान निर्धारीत 20 ओव्हरींनी 6 विकेटी वगडावन 129 धांवड्यो केल्यो.
ओपनरांनी अफगाणिस्तानाक बरी सुरवात करून दिल्ली. हजरतुल्ला झजाई आनी रहमानुल्ला गुरबाज ह्या ओपनरांनी आक्रमक बॅटींग केली. दोगांयनी तीन ओव्हरींनी 27 धांवड्यो केल्यो. पूण, ते उपरांत हॅरीस रॉउफान गुरबाजाक बाद करून अफगाणिस्तानाच्या बॅटिंगेक गडगडावपाक सुरवात केली.
दुसरो ओपनर हजरतुल्ला 21 धांवड्यो करून तंबूंत परतलो. ते उपरांत इब्राहीम झाद्रान अफगाणिस्तानाचो डाव सांबाळपाचो यत्न केलो. पूण, दुसरे वटेच्यान ताका म्हणपा सारकी साथ मेळ्ळी ना. अखेरेक हॅरीसाच्या बॉलाचेर तो 35 धांवड्यो करून बाद जालो.
झाद्रान सगल्यांत चड धांवड्यो करतना अफगाणिस्तानाक शंबराचो आंकडो हुपून दिलो. जाल्यार राशिद खानान 15 बॉलांनी नाबाद 18 धांवड्यो करीत अफगाणिस्तानाचो स्कोर 129 मेरेन पावयलो.
पाकिस्ताना वतीन नसीम शाह आनी हॅरीस रौफ हांणी उत्कृश्ट बॉलींग केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
