भांगरभूंय | प्रतिनिधी
इंग्लंडा आड चालू आशिल्ले दुसरे टॅस्टीच्या पयल्या दिसा येजमान पाकिस्तानान 5 विकेटी व्हगडावन 259 धांवड्यो केल्यात.
आदलो मुखेली बाबर आजमाचे सुवातेर घेतिल्ल्या कामरान गुलामान पदार्पणाचे टॅस्टींत शेंकडो नोंदयलो. ताचे खेरीत सईम अय्युबान अर्द शेंकडो मारलो. बाबर आझम फॉर्म मेळोवपाक झुजतालो. ताका लागून पंगड वेवस्थापनान ताका दुसरे आनी तिसरे टॅस्टी खातीर पंगडांतल्यान भायर दवरपाचो निर्णय घेतलो.
पाकिस्तानान टॉस जिखून पयलीं बॅटींग करपाचो निर्णय घेतलो. पूण, ताची सुरवात बरी जाली ना. 15 धांवड्यांचेर ताणें पयली विकेटी व्हगडायली. जॅक लिचान ओपनर अब्दुल्ला शफीकाक बोल्ड केलो. अब्दुल्ला शफीकान 28 बॉलांनी 7 धांवड्यो केल्यो.
19 धांवड्यांचेर दुसरी विकेट पडली. मुखेली शान मसूद (3) रोखडोच तंबूंत परतलो. ताका लेगीत लिचानूच बाद केलो. ते उपरांत सईम अय्यूब आनी कामरान गुलाम हांणी तिसरे विकेटी खातीर 149 धांवड्यांची भागिदारी केली. मॅथ्यू पॉट्सान ही जोडी फोडली. ताणें सईमाक बाद केलो. बेन स्टोक्सान ताची कॅच धरली. सईमान 160 बॉलांनी 77 धांवड्यो केल्यो. हातूंत सात चवक्यांचो आस्पाव लेगीत आशिल्लो. 178 धांवड्यांचेर चवथो धपको बसलो. सऊद शकील 4 धांवड्यो करून बाद जालो.
85वे ओव्हरींत पदार्पणाची टॅस्ट खेळपी कामरान बाद जालो. शोएब बशीरान ताका बाद केलो. कामरानान 224 बॉलांनी 118 धांवड्यो केल्यो. ताणें 11 चवके आनी एक सको मारलो. विकेटकीपर बॅट्समन मोहम्मद रिजवान 89 बॉलांनी 37 धांवड्यो आनी आगा सलमान 19 बॉलांनी 5 धांवड्यो करून खेळटा.
इंग्लंडा वतीन जॅक लिचान 2 विकेटी घेतल्यो. ताचे खेरीत मॅथ्यू पॉट्स, ब्रायडन कारसे आनी शोएब बशीर हाणें एकेक विकेट मेळयली.
तीन टॅस्टींचे माळेंत इंग्लंड 1-0 असो मुखार आसा. पयली टॅस्ट ताणें डाव आनी 47 धांवड्यांनी जिखिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
