पाकिस्तान एके धांवडेन हारलो

भांगरभूंय | प्रतिनिधी

पाकिस्तानाक संवसारीक टी-20 सर्तीच्या सुपर 12तले मॅचींत धपको बसपी हार घेवची पडली. पर्थ स्टेडियमाचेर जाल्ले मॅचींत ताका दुबळ्या झिम्बाब्वे कडल्यान एके धांवडेन हार घेवची पडली.

ते पयलीं टॉस जिखून पयलीं बॅटींग करपाचो निर्णय घेवपी झिम्बाब्वेन निर्धारीत 20 ओव्हरींनी 8 विकेटी वगडावन 130 धांवड्यो केल्यो.

पाकिस्ताना वतीन मोहम्मद वासिमान चार विकेटी घेवन झिम्बाब्वेचो डाव गडगडावन उगडयलो. पूण, 131 धांवड्यांचो फाटलाव करतना पाकिस्तानाक लेगीत घाम आयलो. अखेरेक झिम्बाब्वेन निमाण्या बॉलाचेर जैत जोडून इतिहास घडयलो. पाकिस्तानाक 8 विकेटी वगडावन 129 धांवड्यो करप शक्य जाल्यो. हेर हारीक लागून पाकिस्तान लागींलागीं सेमी फायनलीचे सर्तींतल्यान भायर पडिल्ल्यांत जमा जाला.

पयले मॅचींत ताका भारता कडल्यान चार विकेटींनी हार घेवची पडिल्ली. अंदूंचे संवसारीक टी-20 सर्तींतलो हो पांचवो धपको बसपी निकाल थारलो. हाचे आदीं वॅस्ट इंडीज, इंग्लंड आनी श्रीलंका हांकां लेगीत धपके बसपी निकालांक तोंड दिवचें पडलां.

झिम्बाब्वे वतीन अश्टतासांचो खेळगडो सिकंदर रजान तीन विकेटी घेतल्यो. ताचीच मॅन ऑफ द मॅच पुरस्कारा खातीर निवड जाली. पाकिस्ताना वतीन शान मसुदान सगल्यांत चड 44 धांवड्यांचें योगदान दिलें.

131 मोखीचो फाटलाव करपाक मैदानाचेर देंवपी पाकिस्तानाक ब्रॅड एव्हान्सान पयलो धपको दिलो. ताणें मुखेली बाबर आजमाक 13 धांवड्यांचेर बाद केलो. ताच्या फाटोफाट मुझारबानीन मोहम्मद रिझवानाक 14 धांवड्यांचेर बोल्ड करून पाकिस्तानाच्या दोनूय स्टार बॅट्सनांक तंबूंत धाडले. दोनूय अणभवी बॅट्समन बाद जाल्या उपरांत शान मसुदान इफ्तिकार अहमदा वांगडा मेळून भागिदारी रचपाचो यत्न केलो. पूण, जॉंग्वेन इफ्तिकाराक 5 धांवड्यांचेर बाद करून पाकिस्तानाची अवस्था 7.4 ओव्हरींनी 3 बाद 36 अशी केली.

ते उपरांत आयिल्ल्या शादाब खानान शान मसुदाक बरी साथ दिवपाचो यत्न केलो. ह्या दोगांयनी पंगडाक 88 धांवड्यां मेरेन पावयलो. पूण, 14 बॉलांनी 17 धांवड्यो करून अहमदान मसुदाची साथ सोडली. ताका सिकंदरान फाटीं धाडलो. रझा हांगाच थांबूंक ना. ताणें तेच ओव्हरीच्या पांचव्या बॉलाचेर हैदर अलीक बाद केलो. पाकिस्तानाचो अर्दो पंगड 88 धांवड्यांचेर तंबूंत परतून गेल्लो. अशा वेळार पाकिस्तानाची सगली भिस्त शान मसुदाचेर आशिल्ली.

सिकंदर रझान आपले फुडले ओव्हरींत 38 धांवड्यो करून 44 धांवड्यो करपी मसुदाक बाद केलो. रझाची ही तिसरी विकेट आशिल्ली.

पाकिस्तानाची अवस्था 6 बाद 96 अशी जाल्या उपरांत अश्टतासांचो खेळगडो मोहम्मद नवाझाचेर पुर्ण पाकिस्तानाच्या चाहत्यांची आस्त आशिल्ली.

मॅच 18 बॉलांनी 29 धांवड्यो आशिल्ली जाल्ली. नवाझाची साथ दिवपाक आयिल्ल्या मोहम्मद वासिमान ओव्हरीची सुरवात बरी केली. ताणें पयल्या तीन बॉलांचेर स धांवड्यो केल्यो. पूण, मुझाराबानीन फक्त 1 धांवडी दिली. हे ओव्हरींत पाकिस्तानाक सात धांवड्यो करप शक्य जाल्यो.

आतां पाकिस्तानाक 12 बॉलांनी 21 धांवड्यांची गरज आशिल्ली. स्ट्रायकाचेर नवाझ आशिल्लो. नगारवान पयल्या तीन बॉलांचेर चार धांवड्यो दिल्यो. ते उपरांत नवाझान सको मारून धांवड्यांचें अंतर उणें करपाचो यत्न केलो. हे ओव्हरींत पाकिस्तानान 11 धांवड्यो केल्यो. निमाणे ओव्हरींत पाकिस्तानाक 11 धांवड्यांची गरज आशिल्ली.

निमाणे ओव्हरीच्या पयल्या बॉलाचेर नवाझान तीन धांवड्यो केल्यो. ते उपरांत वासिमान चवको मारून चार बॉलांनी चार अशें समीकरण केलें. ते उपरांत वासिमान एक धांवडी घेत मॅच तीन बॉलांनी तीन अशी केली. पूण, ब्रॅड इव्हानान चवथ्या बॉलाचेर धांवडी दिवंक ना. ते उपरांत पांचव्या बॉलाचेर सको मारपाच्या यत्नांत नवाझ बाद जालो. ताणें 18 बॉलांनी 22 धांवड्यो केल्यो.

आतां पाकिस्तानाक एका बॉलाचेर तीन धांवड्यांची गरज आशिल्ली. स्ट्रायकाचेर शाहिन आफ्रिदी आशिल्लो. ब्रॅडान फक्त एक धांवडी दिली. आफ्रिदी दुसरी धांवडी घेवपाच्या यत्नांत धांवबाद जालो आनी पाकिस्तान एके धांवडेन हारलो.