भांगरभूंय | प्रतिनिधी
खबरां संस्था
कोलंबोः भारताक 128 धांवड्यांनी हरोवन पाकिस्तान पंगडान इमर्जिंक आशिया कप क्रिकेट सर्तीचें वस्तादपण मेळयलें. पाकिस्तानान जैता खातीर दिल्ल्या 253 धांवड्यांच्या लक्ष्याचो फाटलाव करतना भारताचो डाव 40 ओव्हरींत 224 धांवड्यांत सोपलो. बरी सुरवात करून लेगीत भारताचो डाव गडगडलो. तय्यब ताहिराचो शेंकडो आनी सुफियान मुकीमान 3 विकेटी घेवन पंगडाक जैत मेळोवन दिलें.
तय्यब ताहिरान 12 चौके आनी 4 सक्यांनी केल्ल्या वादळी (108) शेंकड्याच्या खुस्तार पाकिस्तानी पंगडान इमर्जिंग आशिया कप क्रिकेट सर्तीचे फायनलींत 50 ओव्हरींत 8 आवट 352 धांवड्यो केल्यो. सलीम अयुब आनी साहिबजादा फरहान ह्या ओपनरांनी पाकिस्तानाच्या डावाची सुरवात बेस बरी केली. तांणी पयले विकेटी खातीर 121 धांवड्यांची भागिदारी केली. मानव सुतारान सलीम अयुबाक ध्रूव ज्युरेल वरवी कॅच आवट करून ही जोडी फोडली. फरहानान उमर युसूफाच्या सांगातान 146चेर व्हेली आनी तो रनआवट जालो. ताणे 62 बॉलांत 4 चौके आनी 4 सक्यांनी 65 धांवड्यो केल्यो जाल्यार अयुबान 51 बॉलांत 7 चौके आनी 2 सक्यांनी 59 धांवड्यो केल्यो.
कासीम अक्रम (0) आनी कॅप्टन मोहम्मद हॅरीस (2) सवाय भिरत आवट जाले. अक्रमाक रियान परागान हर्षील राणा कडेन कॅच दिवपाक लायली जाल्यार मोहम्मद हॅरीसाक निशांत संधून क्लीन बोल्ड केलें. तय्यब ताहिरान उमर युसुफा वांगडा तिसरे विकेटी खातीर
37 धांवड्यांची भागिदारी करून स्कोर 183चेर व्हेलो. 4 चौक्यांनी 35 धांवड्यो करपी उमराची विकेट रियान परागान घेतली. 5 आवट 187 वयल्यान पंगडांक 313 धांवड्याचेर व्हरून दवोरून तय्यब ताहिर आवट जालो. ही म्हत्वाची विकेट आर एक हंगरकरान घेतली. ताच्या बॉलार फटको मारतना ताहिराचो अदमास चुकलो आनी अभिषेकाच्या हातांत ताणे कॅच दिली. मुशीर खानान 47 बॉलांत 2 चौके आनी 2 सक्यांनी 35 धांवड्यांचे योगदान दिलें. मेहरम मुमतात (13) आनी मोहम्मद वसीक ज्युनियरान नाबाद 17 धांवड्यो केल्यो. भारता वतीन आर एस हंगरकार आनी रियान परागाद दरेकी 2 विकेटी घेतल्यो. हर्षीत राणा, मानव सुतार आनी निशांत संधूक दरेकी एक विकेट मेळ्ळी.
साई सुदर्शन आनी अभिषेक शर्मा हांणी भारताच्या डावाची बरी सुरवात केली. तांणी पयले विकेटी खातीर 64 धांवड्यो केल्यो. अर्शद इक्बालान साईक आवट करून ही जोडी फोडली. ताणे 28 बॉलांत 4 चौक्यांनी 29 धांवड्यो केल्यो. पंगडाच्या 80 धांवड्यांचेर निकीन जोस (11) आवट जालो. पंगडाच्यो 132 धांवड्यो करून अभिषेक वर्मा 51 बॉलांत 5 चौके आनी एक सक्यान 61 धांवड्यो करून आवट जालो. कासीम अक्रमान ताची विकेट घेतली. कॅप्टन यश धुले 41 बॉलांत 4 चौक्यांनी 39 धांवड्यो करून आवट जालो. 179 ध्रूव ज्युरेल (9) आनी उपरांत 188 धांवड्यांचेर रियान पराग (14) आवट जालो आनी मॅच भारताच्या हातांतल्यान गेली. भारताचे तळाचे बॅट्समन एका फाटल्यान एक अशे आवट जाले. सुफियान मुकीमान 3 जाल्यार अर्शद इक्बाल, मेहरम मुमताज आनी मोहम्मद वसीम ज्युनिअरान दरेकी 2 विकेटी घेतल्यो. मुशबीर खानाक एक विकेट मेळ्ळी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
