पाकिस्तानी संघ सात वर्सां उपरांत भारतांत
भांगरभूंय | प्रतिनिधी
भांगरभूंय । खबरां संस्था
नवी दिल्ली : संवसारभरांतल्या क्रिकेट मोगींक वनडे वर्ल्ड कपांत भारत आनी पाकिस्तान हांचे मदली मॅच परत एक फावट पळोवपाक मेळटली. हें आतां निश्चीत जालां. भारतांत जावपी विश्वचशका खातीर पाकिस्तानी संघ धाडपाक, ज्यो आडखळी येताल्यो त्यो आतां पयस जाल्यात. पाकिस्तान सरकारान वर्ल्ड कपा खातीर आपलो पंगड भारतांत धाडपाक परवानगी दिल्या. ताका लागून 7 वर्सां उपरांत पाकिस्तानी संघ परत भारतांत येतलो. हाचे पयलीं 2016 च्या टी- 20 विश्वचशका खातीर पाकिस्तानान भारताची भोंवडी केल्ली.
14 ऑक्टोबराक एका दिसाच्या वर्ल्ड कपांत भारत आनी पाकिस्तान हांचे मदीं अहमदाबादच्या नरेंद्र मोदी स्टेडियमाचेर मॅच जावं येता.
पाकिस्तानाच्या परराष्ट्र मंत्रालयान निवेदनांत म्हणलां, खेळ आनी राजकारण एक करपाचें ना. ताका लागून पाकिस्तान पंगड भारतांत धाडपाचो निर्णय घेतला. भारत आनी पाकिस्ताना मदले संबंद खेळां मदीं येवचे न्हय.
पंगड धाडपाचो निर्णय घेवपाक पाकिस्तानाचे प्रधानमंत्री शेहबाज शरीफ हांणी परराष्ट्र मंत्री बिलावल भुट्टो झरदारी हांचे अध्यक्षते खाला एक समिती स्थापन केल्ली. हातूंत सरकाराचे हेर मंत्रीय आशिल्ले. जातूंत भुट्टो हांचे वांगडा चडश्या मंत्र्यांनी पंगड भारतांत धाडपाक फाटबळ दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
