भांगरभूंय | प्रतिनिधी
गृहमंत्री शाह कडल्यान सगल्या मुख्यमंत्र्यांक पाकिस्तानी नागरिकांची वळेरी तयार करपाचे निर्देश
खबरां संस्था
नवी दिल्ली : केंद्रीय गृहमंत्री अमीत शाह हांणी शुक्रारा देशांतल्या सगल्या मुख्यमंत्र्यां कडेन चर्चा केली आनी तांकां आपापल्या राज्यांत रावपी पाकिस्तानी नागरिकांक वळखुपाचे निर्देश दिले. अधिकाऱ्यांनी दिल्ले म्हायती प्रमाण, हें पावल जम्मू-काश्मीरांतल्या पहलगामांत जाल्ल्या आतंकवादी हल्ल्या उपरांत भारत आनी पाकिस्तान हांचे मदीं वाडल्ल्या तणावात लागून उखल्लां.
गृहमंत्री शाह हांणी मुख्यमंत्र्यांक सांगलें, तांच्या राज्यांत रावपी पाकिस्तानी नागरिकांची वळेरी केंद्र सरकाराक धाडात, कारण तांचो व्हिसा तत्काळ रद्द करपाक मेळचो आनी तांकां भारता भायर धाडपाक मेळचे.
22 एप्रीलाक पहलगामाच्या बैसारन वाठारांत जाल्ल्या आतंकवादी हल्ल्यांत 25 भारतीय पर्यटकांक आनी एका नेपाळी नागरिकाक मरण आयिल्लें. हो हल्लो 2019 च्या पुलवामा हल्ल्या उपरांत काश्मीर देगणांतलो सगल्यांत घातक हल्लो मानतात. भारतान ह्या हल्ल्या खातीर पाकिस्तान तेंको दिता त्या आतंकवादाक जापसालदार धरला. हाका जाप म्हूण साबार खर पावलां उखल्ल्यांत. हातूंत 1960 सिंधू उदक समजिकायेक निलंबीत करप, अटारी-वाघा शीम चौकी बंद करप, पाकिस्तानी सैन्य अधिकाऱ्यांक नवी दिल्लींतल्यान भायर धांवडवप आनी सगळ्या पाकिस्तानी नागरिकांचे व्हिसा रद्द करप, हांचो आस्पाव आसा.
गृह मंत्रालयाच्या सुत्रांनी दिल्ले म्हायती प्रमाण, अमीत शाह हांणी मुख्यमंत्र्यांक सांगलां, आपापल्या राज्यांनी रावपी सगळ्या पाकिस्तानी नागरिकांची वळेरी तयार करची आनी ती केंद्र सरकाराक धाडची. 27 एप्रील सावन पाकिस्तानी नागरिकांचे सगळे सध्याचे व्हिसा रद्द करतले, पूण वैजकी व्हिसा 20 एप्रील मेरेन वैध आसतले, अशें सरकारान हे आदींच घोशणा केल्या. ते भायर भारतीय नागरिकांक पाकिस्तानांतल्यान बेगीन येवपाचो सल्लो दिला.
पाकिस्तानी नागरिकांची वळेरी तयार करपाच्या कामाक सगल्यांत चड प्राधान्य दिवचें आनी आपापल्या राज्यांतली कायदो आनी सुवेवस्था सांबाळची. पाकिस्तानी नागरिकांची वळख आनी तांचे व्हिसा रद्द करपाचे प्रक्रियेंत मातूय कळाव जावपाक जायना, अशें अमीत शाह हांणी मुख्यमंत्र्यांक सांगलां.
सुत्रांनी दिल्ले म्हायती प्रमाण केंद्र सरकार ह्या प्रकरणांत राज्यां वांगडा मेळून काम करता, कारण ही प्रक्रिया सहजतायेन पुराय जावची.
पाकिस्तानाक उदकाचो एक थेंब दिवचे नात : जल शक्ती मंत्री
पाकिस्तानाक उदकाचो एक थेंब दिवचें नात म्हूण जल शक्ती मंत्री सी. आर. पाटील हांणी स्पश्ट केलें. भारतान सिंधू जल समझोता स्थगीत केला. तशेंच भारत 3 प्रकल्पांचेर काम करता. भारता कडेन सगळो प्लान तयार आसा, अशेंय तांणी म्हणलें.
दोन आतंकवाद्यांचीं घरां नश्ट
शुक्रारा सुरक्षा दळाच्या जवानां कडल्यान पहलगाम आतंकवादी हल्ल्यांत आस्पाव आशिल्ल्या लश्कर ए तैयबाच्या दोन आतंकवाद्यांचीं जम्मू-काश्मीरांतलीं घरां नश्ट जालीं. अधिकाऱ्यांनी दिल्ले म्हायती प्रमाण सुरक्षा दळान आतंकवादी आदील हुसैन थोकर आनी आसीफ शेख हांकां धरपाक मोहीम चालीक लायिल्ली. तांच्या घराची तपासणी करताले तेन्ना घरांत आदींच दवरिल्ल्या स्फोटकांचो स्फोट जालो. जम्मू-काश्मीरांतल्या अनंतनाग जिल्ह्यांतल्या बिजबेहरा ब्लॉकाच्या गुरी गांवांत रावपी आदील थोकर पहलगाम हल्ल्यांत वांटेकार आशिल्लो. ह्या आतंकवाद्यांक मोस्ट वॉण्टेड घोशीत केल्ले आनी अनंतनाग पुलिसांनी तांचे विशीं म्हायती दिवप्याक 20 लाखांचें इनाम जाहीर केल्लें. तेचवरी दुसरो आतंकवादी आसिफाच्या घराचेर जम्मू-काश्मीर पुलिसांनी बुलडोझर घालून तें मातये भरवण केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
