पाकिस्ताना आड खेळपाक भारताक परवानगी

भांगरभूंय | प्रतिनिधी

बहुराष्ट्रीय सर्तींत पाकिस्ताना आड खेळपाचो भारताचो मार्ग भारत सरकारान मेकळो केलो. अशे तरेन फुडल्या म्हयन्यांत जावपी आशिया करंड क्रिकेट सर्तींत आनी बायलांचे संवसारीक वन डे क्रिकेट सर्तींत भारताचो पंगड पाकिस्ताना आड खेळटलो. पूण, पाकिस्ताना आड द्विपक्षीय माळ खेळपाक खेळां मंत्रालयान परवानगी दिवंक ना.

मंत्रालयान पाकिस्ताना वांगडा भारताच्या आंतरराष्ट्रीय खेळां संबंदांचेर विशेश लक्ष केंद्रीत करपी नवीन धोरण जाहीर केलें. हें धोरण तात्काळ प्रभावान लागू जाल्ल्याचें सुत्रांनी सांगलें.

द्विपक्षीय माळ खेळपाक भारताक पाकिस्तानाक वचपाक परवानगी मेळची ना तशेंच पाकिस्तानाक द्विपक्षीय माळ खेळपाक भारतांत येवपाक परवानगी दिवचे नात. पूण, ह्या धोरणाचो परिणाम बहुराष्ट्रीय सर्तीचेर जावचो ना. आशिया करंड  सर्त ही बहुराष्ट्रीय सर्त आशिल्ल्यान आमी भारतीय क्रिकेट पंगडाक तातूंत खेळपा पसून आडावचे नात, ऑलिम्पीक सनदेच्या नेमांचें पालन करपाक आमी बांदील आसात अशें मंत्रालयान स्पश्ट केलें. 

अंदूं एप्रीलांत पहलगामांत आतंकी हल्लो जाल्या उपरांत भारत आनी पाकिस्तान ह्या देशां मदलें संबंद आनीक इबाडिल्ले. वर्ल्ड चॅम्पियनशीप ऑफ लिजेण्डांत इंडिया चॅम्पियन्स पंगडान पाकिस्तान चॅम्पियन्स पंगडा आड ली मॅचींत आनी सेमी फायनलींत खेळपाक न्हयकार दिल्लो. ताका लागून पाकिस्तान चॅम्पियन्साक फायनलींत थेट सुवात मेळिल्ली.

आशिया करंड सर्तींत भारत आनी पाकिस्तान ह्या पंगडां मदली मॅच दुबयंत 14 सप्टेंबराक जातली. बायलांची संवसारीक वन डे क्रिकेट सर्त अंदूं जावपाची आसा. भारत आनी पाकिस्तान ह्या पंगडां मदली मॅच 5 ऑक्टोबराक कोलंबोंत जातली.

दोनूय देशां मदीं निमाणी द्विपक्षीय माळ 2012त जाल्ली. ते उपरांत संवसारीक सर्त, चॅम्पियन्स ट्रॉफी आनी आशिया करंड सर्तींत हे पंगड एकामेका आड खेळिल्ले.

पाकिस्तानान 2016त जाल्ले संवसारीक टी-20 सर्ती खातीर आनी 2023चे संवसारीक वन डे क्रिकेट सर्ती खातीर भारताची भोंवडी केल्ली. पूण, अंदूंचे चॅम्पियन्स ट्रॉफी खातीर भारतान पाकिस्तानाची भोंवडी करूंक नाशिल्ली. ते उपरांत भारतान फायनली सयत आपल्यो हेर मॅची दुबय खेळिल्ल्यो.

आशिया करंड सर्तीची येजमानकी भारत करपाचो आशिल्लो. पूण, दोनूय देशां मदीं चालू आशिल्ल्या तणावाक लागून अखेरेक ही सर्त दुबय स्थलांरीत केली.