भांगरभूंय | प्रतिनिधी
खबरां संस्था
नवी दिल्ली : शेनवारा सांजेच्या 5 वरांचेर भारत आनी पाकिस्तान हांचे मदीं सीजफायर जालो. ते उपरांत फक्त 3 वरां भितर पाकिस्तानान सीजफायर मोडलो. शेनवारा रातच्या 8 वरां सावन जम्मू- काश्मीरांतल्या अखनूर, पूंछ, नौशेरा, श्रीनगर, आरएस पुरा, सांबा, उधमपूर वाठारांत पाकिस्ताना कडल्यान फारपेट चालू आसा. राजौरींत तोफांचो मारो केलो. उधमपूरांत ड्रोन हल्लो जालो.
काश्मीरांतल्या श्रीनगरांत खूब स्फोट जाले. लालचौक, बीबी कॅन्ट एरिया आनी सफापोरा वाठारांत दहशतीचें वातावरण आसा. जम्मू काश्मीराचे मुख्यमंत्री ओमर अब्दुल्ला हांणी म्हणलें, हो कसलो सीजफायर? श्रीनगरांत स्फोटांचे आवाज आयकुपाक येतात. सीजफायरा उपरांत जम्मू काश्मीर, राजस्थान आनी पंजाबाचे शिमे वयल्या जिल्ह्यांतलो ब्लॅकआवट रद्द केलो, पूण जम्मू काश्मीरांत पाकिस्ताना कडल्यान जाल्ल्या फारपेटा उपरांत परतून ब्लॅकआवट लागू केला. शिमे वयल्या जिल्ह्यांनी वीज पुरवण बंद आसा. लोकांनी घरा भायर सरचे न्हय, असो सल्लो दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
