भांगरभूंय | प्रतिनिधी
इस्लामाबाद, खबरां संस्था: पाकिस्तानाच्या पंजाब प्रांतात पतंग हुबोवपाचेर बंदी घातली. पंजाब विधानसभेनूय हे विशीं एक विधेयक मंजूर केलां. पतंग हुबयतना धरल्यार ३ ते ५ वर्सां बंदखण वा २० लाख पाकिस्तानी रुपया (६ लाख भारतीय रुपये) दंड वा दोनूय जावपाक शकता. दंड भरिना जाल्यार एका वर्साची ख्यास्त जावपाक शकता.
पतंग तयार करपी आनी तांची विक्री करप्यांक खर ख्यास्तीची घोशणा ह्या विधेयकांत केली. तांकां ५ ते ७ वर्सां बंदखण वा ५० लाख रुपया दंड वा दोनूय ख्यास्त जावपाक शकतात. दंड भरिना जाल्यार २ वर्सांची ख्यास्त जावपाक शकता.
ह्या कायद्यांत नेण्ट्या भुरग्यां खातीर ख्यास्तीची स्वतंत्र तरतूद आसा. नेण्ट्या भुरग्यांक पयल्या गुन्यांवा खातीर ५०,००० रुपया आनी दुसर्या गुन्यांवा खातीर १ लाख रुपया दंड आयकयतले. तिसरे फावट गुन्यांव केल्यार २०१८ च्या बाल न्याय कायद्या प्रमाण ख्यास्त आयकयतले.
मजगतीं, लोकांमदीं भंय पातळावपाक इतले व्हड ख्यास्तीची आनी दंडाची तरतूद केल्या, अशें अहवालांत म्हणलां. हो कायदो सगळे तरेच्या दोरयांनी केल्ल्या पतंगांक लागू जाता. फाटल्या वर्सा ऑक्टोबरांत पंजाब सरकारान पतंग करप, हुबोवप आनी विकप हो अजामीनपात्र गुन्यांव म्हणून घोशीत केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
