भांगरभूंय | प्रतिनिधी
कराची, खबरां संस्था: पाकिस्तानाच्या पंजाब प्रांतांत वाडत वचपी वार्याच्या प्रदुशणाक लागून उद्यानां, प्राणीसंग्रहालयां, खेळां मैदानां, संग्रहालयां अशा भौशीक सुवातींनी प्रवेशाचेर बंदी घाल्या. धुकें वाडिल्ल्यान पंजाबांत हवेचो दर्जो धोक्याच्या पांवड्यार पावला. हाचे भायर सगळ्यो शाळो आनी म्हाविद्यालयां १७ नोव्हेंबर मेरेन बंद करपाक लायल्यांत.
आयतारा लाहोरांत धुक्याचो दाट थर आशिल्लो. शाराच्या हवेच्या दर्ज्याच्या निर्देशांकानय ह्या काळांत १००० इतलो धोक्याची पातळी हुपली. लोकांचे भलायकेचो हुस्को जाल्ल्यान सरकारान लोकांक भौशीक सुवातींनी वचप आनी गरजे भायर घरांतल्यान भायर सरपाचेर बंदी घाल्या.
घरांतल्यान काम करपाचो आदेश
पंजाब सरकारान शुक्रारा जारी केल्ल्या आदेशांत लाहोर, गुर्जनवाला, फैसलाबाद, मुलतान, शेखूपुरा ह्या सारक्या हेर १२ शारांनी १७ नोव्हेंबर मेरेन ही बंदी लागू उरतली. सरकारान पयलींच शाळा, म्हाविद्यालयां बंद केल्यांत. लाहोर सयत १८ जिल्ह्यांतल्या सरकारी कर्मचार्यांक घरांतल्यान काम करपाक सांगलां.
पंजाब सरकारान फाटल्या सप्तकांतच धुकें जाल्ल्यान हुस्को उक्तायिल्लो. हाचे भायर लाहोराच्या जायत्या वाठारांनी ग्रीन लॉकडावनाचीय चाल सुरू जाल्या. तशेंच राज्यांत कृत्रीम पावस पडपाचोय सरकार विचार करता. पूण ताची तारीख थारावंक ना.
पाकिस्तानाच्या पंजाब सरकारान फाटल्या वर्सा डिसेंबर २०२३ वर्सा युएईच्या आदारान धुकें आडावपा खातीर एक प्रयोग केल्लो. संवसारांतल्या सगळ्यांत प्रदुशीत शारांतल्या लाहोर शारांत कृत्रीम पावस पडलो. हातूंत क्लावड सीडिंगच्या प्रयोगाक लागून सुमार १० टक्के वाठारांनी पावस पडलो. तेन्नाचे मंत्री बिलाल अफजल हांणी कृत्रीम पावसा उपरांत अटख १५० मेरेन वाडला अशें सांगिल्लें, पूण तातुंतल्यान फकत २-३ दिसां खातीर ही सुटका मेळ्ळी.
आतां देशांतल्या सगळ्यांत प्रदुशीत शारांनी लाहोर पयल्या क्रमांकाचेर आशिल्ल्यान पाकिस्तान सरकार परतून एक फावट कृत्रीम पावसाचो विचार करता. पूण खर्च खूब चड आसतलो अशें अदमास आसा. त्याच वेळार कांय म्हयन्यां आदीं दिल्लींतय एक प्रयोग जालो, पूण तो येसस्वी जावंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
