भांगरभूंय | प्रतिनिधी
फुडल्या म्हयन्यांत भारतांत सुरू जावपी संवसारीक वन डे क्रिकेट सर्ती खातीर पाकिस्तानान आपल्या 15 वांगड्यांच्या पंगडाची घोशणा केली. बाबर आजमाक मुखेलपदाचेर कायम दवरला.
युवा फास्ट बॉलर नसीम शाहाक भुजाचे दुखापतीक लागून पंगडांत सुवात मेळूंक ना. ताचे सुवातेर अणभवी फास्ट बॉलर हसन अलीची निवड केल्या अशें निवड समितीचे अध्यक्ष इंझमाम उल हक हांणी सांगलें.
20 वर्सां पिरायेचो नसीम आशिया करंड क्रिकेट सर्तींत भारता आड खेळटना जखमी जाल्लो. दोतोरांनी ताका ऑपरेशन करपाचो सल्लो दिला. तीन ते चार म्हयन्यांनी तो परतून खेळपाक शकता.
निवड समितीन तीन राखीव खेळगड्यांची लेगीत घोशणा केली. विकेटकीपर बॅट्समन मोहम्मद हॅरीस, स्पिनर अबरार अहमद आनी फास्ट बॉलर जमान खान हे पंगडा वांगडा भारतांत येतले. सर्ती वेळार खंयचोय खेळगडो जखमी जालो जाल्यार तांच्या नांवाचेर विचार जातलो.
नसीमाचे सुवातेर पंगडांत आस्पाव केल्लो हसन अली सुमार एका वर्सा उपरांत पुनरागमन करता. ताणें आपली निमाणी वन डे मॅच वॅस्ट इंडिजा आड मुल्तानांत पोरूं 12 जूनाक खेळिल्लो. ताणें 60 मॅचींनी खेळटना 5.75चे सरासरीन 91 विकेटी घेतल्यात.
पंगडः बाबर आजम (मुखेली), शादाब खान, फखर जमान, इमाम-उल हक, अब्दुल्लाह शफीक, मोहम्मद रिजवान, सऊद शकील, इफ्तिखार अहमद, सलमान अली आगा, मोहम्मद नवाज, उसामा मीर, शाहीन शाह अाफ्रिदी, हरिफ रऊफ, मोहम्मद वसीम जूनियर आनी हसन अली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
