भांगरभूंय | प्रतिनिधी
खबरां संस्था
सिडनीः पाकिस्तानान दक्षीण आफ्रिकेक हारोवन भारताचें मात टेन्शन वाडयलां. हे मॅची उपरांत पाकिस्तानांत गुण क्रमवारींत आतां तिसरी सुवात मेळयल्या. हारिल्ली आफ्रिका आसा तेच म्हणल्यार दुसरे सुवातेर आसा. भारत सगल्यांत चड 6 गुणांनी पयले सुवातेर जरी आसलो तरी रन रेटीचे बाबतींत अव्वल तिनांत तिसरे सुवातेर आसा.
चारांतल्या एके मॅचींत हार खावची पडिल्ल्यान भारताच्या नांवार 6 गुण जमा जाल्यात. भारताचो नेट रन रेट हो +0.730 इतलो आसा. नेट रन रेटाचे बाबतींत पाकिस्तान भारताच्या फुडें आसा. तांणी दक्षीण आफ्रिकेक हारोवन दोन गुण मेळयले आनी गुण क्रमवारींत तिसरी सुवात मेळयली. पयल्यो दोन मॅची तांणी निमाण्या बॉलाचेर वोगडायल्ल्यान तांचो नेट रेन रेट भारता परस बरो आसा.
सर्त कोणा मदीं
दक्षीण आफ्रिकेचो नेट रन रेट 1.441 इतलो आसा. एक मॅच पावसाक लागून जावपाक शकली ना आनी मेळल्लो एक गुण दोन जैताक लागून मेळिल्ले गुण धरून तांचे 5 गुण जाल्यात. पाकिस्ताना कडल्यान हार खावची पडिल्ल्यान तांचो तांका नेट रन रेटांत व्हड फटको बसला. पाकिस्ताना आडचे मॅची पयलीं हो रन रेट 2.772 इतलो आशिल्लो. पात्रताय फेरयेंत बांगलादेश लेगीत आसा. पाकिस्ताना प्रमाण ताचेंच 4 गुण आसात. मात ताचो नेट रन रेट उणे 1.276 इतलो आसा. टी-20च्या दुसऱ्या गटांत झिम्बाब्वे आनी नेदरलंड भायर पडिल्ल्यांत जमा आसात. दरेका गटांतल्यान दोन पंगड उपांत्य फेरये खातीर पात्र थारतले. ताका लागून सध्या तरी दुसऱ्या गटांतल्यान भारत, दक्षीण आफ्रिका, पाकिस्तान आनी बांगलादेश हांचे मदी निमणे दोन सुवातां खातीर चुरस दिसून येता.
पाकिस्तानाक जाय व्हड जैत
बांगलादेशाचेर संघर्श करून जैत जोडल्या उपरांत भारताचो उपांत्य फेरयेंतलो प्रवेश निश्चीत ना. मात तो मात्सो सोपो जाला. उपांत्य फेरयेंतल्या प्रवेशाचेर म्होर लावपा खातीर भारताक झिम्बाब्वेचेर जैताची गरज आसा. भारत गटांत सध्या पयले सुवातेर आसा. पाकिस्तानान दक्षीण आफ्रिकेक हारोवन आपली आस्त जिती दवोरल्या. सुपर 12तले निमणे मॅचींत तांका बांगलादेशाचेर व्हड फरकान जैत मेळोवचें पडटलें.
आफ्रिकेन पाकिस्तानाक हारयल्लें जाल्यार भारताचो उपांत्य फेरयेतलो प्रवेश सोपो जताशिल्लो आनी पाकिस्तानाचें आव्हान सोंपताशिल्लें. तशेंच झिम्बाब्वे आडचे मॅचींत भारताचेर कमी प्रेशर आसताशिल्लें. पाकिस्तानान सुपर 12 तली आपली बाकी आशिल्ली मॅच व्हडल्या फरकान जिखल्यार आनी आयताराक झिम्बाब्वेन भारताक हारयल्यार नेट रन रेटीच्या आदारात पाकिस्तान गुणक्रमवारीत भारताच्या फुडें वतलो. पाकिस्तानात बांगलादेशाक व्हडल्या फरकान हारयल्यार रन रेट वाडपा वांगडा ताचें गुण 6 जातले आनी ते भारता परस सरस थारतले.
जाल्यार पाकिस्तान, आफ्रिका पात्र थारतले
नेदरलंडान निमाणे मॅचींत दक्षीण आफ्रिकेक हारयल्यार वा पावसाक लागून मॅच जाली ना जाल्यार पाकिस्तान नेट रेन रेटीच्या नेटार दक्षीण आफ्रिकेक फाटीं उडोवपाक शकतलो. बांगलादेशान पाकिस्तानाक हारयल्यार लेगीत ते सर्तीत उरतले. पूण बांगलादेशाक पात्र थारपा खातीर झिम्बाब्वेन भारताक हारोवपाची गरज आसतली. अशा वेळार बांगलादेशाक नेट रन रेटाचो फटको बसपाक शकता. मात ताचो फायदो पाकिस्तानाक जातलो. भारत झिम्बाब्वे आड हारल्यार उपांत्य फेरयेंत वचपाची आश्त धुसर जातली. आनी पाकिस्तान आनी दक्षीण आफ्रिका उपांत्य फेरये खातीर पात्र थारतले. भारताच्या हातांत आतां आयतारा झिम्बाब्वे आडची एकूच मॅच बाकी आसा. झिम्बाब्वेक सादी टीम समजवप पाकिस्ताना भशेन भारताक लेगीत म्हारग पडपाक शकता. ताका लागून उपांत्य फेरयेंत प्रवेश करपाच्या निर्धारान तांका ताचे आड मैदानांत देंवचें पडटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
