भांगरभूंय | प्रतिनिधी
सऊद शकीलाच्या दोट्टी शेंकड्या नेटार पाकिस्तानान येजमान श्रीलंका पंगडा आड चालू आशिल्ले टॅस्टीच्या पयल्या डावांत 461 धांवड्यो करून आपली स्थिती घटमूट केली.
श्रीलंकेन पयल्या डावांत 312 धांवड्यो केल्ल्यो. अशे तरेन पाकिस्तानान 149 धांवड्यांची म्हत्वाची आघाडी घेतल्या. श्रीलंकेन तिसऱ्या दिसाचो खेळ सोंप मेरेन बिनबाद 14 धांवड्यो केल्यात, पाकिस्ताना परस तो अजून 135 धांवड्यांनी फाटीं आसा.
शकीलान नाबाद 208 धांवड्यांची खेळी केली. 361 बॉलांक तोंड दितना ताणें 19 चवके मारले. डिसेंबरांत टॅस्ट क्रिकेटींत पदार्पण करीत सावन शकीलान स टॅस्टींनी खेळटना एक दोट्टी शेंकडो, एक शेंकडो आनी पांच अर्द शेंकडे मारल्यात. ताची सरासरी 98.5 आसा.
पाकिस्तानाच्या डावांतलो शकील मुखेल सुत्रधार थारलो. ताणें सकयले सुवाते वयल्या बॅट्समनांक वांगडा म्हत्वाच्यो भागिदाऱ्यो केल्यो. पाकिस्तानान पयर 101 धांवड्यांचेर पांच विकेटी वगडायिल्ल्यो. ते उपरांत शकील आनी आगा सलमान (83) हांणी सवे विकेटी खातीर 177 धांवड्यांची भागिदारी करून डाव सांबाळ्ळो.
श्रीलंके आड पाकिस्ताना वतीन टॅस्ट क्रिकेटींत सवे विकेटी खातीर अजून मेरेनची ही सर्वोच्च भागिदारी थारली. शकील आनी सलमान हे जोडयेन सरफराज अहमद आनी असद शफिक हांचो पाकिस्तानी विक्रम मोडलो. सरफराज आनी असद हांणी 2017त दुबय जाल्ले मॅचींत 173 धांवड्यांची भागिदारी केल्ली.
शकील आनी सलमान हांणी जलद रितीन धांवड्यो केल्यो. श्रीलंकेच्या स्पिनरां आड दोगांयनी पांयांचो बरे तरेन उपेग केलो. रमेश मॅण्डिसाच्या दिसाचे पयलेच ओव्हरींत शकीलाक 93 धांवड्यांचेर जीवनदान मेळिल्लें. तीन बॉलां उपरांत ताणें शेंकडो पुर्ण केलो. हे ओव्हरीच्या निमाण्या बॉलाचेर सलमान स्टंप बाद जालो. सलमानान 113 बॉलांनी णव चवके आनी एक सको मारलो. शकीलान जेवणाच्या विसवा उपरांत नोमान अली (25) वांगडा मेळून सातवे विकेटी खातीर 52 धांवड्यांची भागिदारी केली. जाल्यार नसीम शाहा वांगडा णववे विकेटी खातीर 94 धांवड्यो जोडल्यो. हातूंत नसीमाचें योगदान फकत 6 धांवड्यांचें आशिल्लें.
श्रीलंकेची फिल्डींग म्हणपा सारकी जाली ना. ताच्या फिल्डरांनी शकीलाक 93 आनी 139चेर जीवनदान दिलें. शकीलान धनंजय डिसिल्वाक चवको मारून आपलो दोट्टी शेंकडो पुर्ण केलो. अबरार अहमद (10) बाद जावपी निमाणो बॅट्समन थारलो.
श्रीलंके वतीन रमेश मॅण्डिसान पांच आनी प्रभात जयसुर्यान तीन विकेटी घेतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
