भांगरभूंय | प्रतिनिधी
पाकिस्तान पंगडान संवसारीक वन डे क्रिकेट सर्तींतले कालचे दुसरे मॅचींत श्रीलंके आड विक्रमी जैत जोडलें. 345 धांवड्यांचे मोखीचो फाटलाव करतना दोन मुखेल बॅट्समन 37 धांवड्यांचेर बाद जाले. तरी लेगीत मोहम्मद रिझवान आनी 23 वर्सां पिरायेचो अब्दुल्लाह शफिक हांची विक्रमी भागिदारी आनी वैयक्तीक शेंकड्यांच्या नेटार पाकिस्तान जैत ओडून हाडलें. संवसारीक सर्तींत पदार्पणाचे मॅचींत शेंकडो मारपी शफिक हो पाकिस्तानाचो पयलो बॅट्समन थारलो. जाल्यार फाटीक दुखापत जावन आनी पांयांक क्रॅम्प येवन लेगीत रिझवानान खेळपट्टी सोडूंक ना. तांच्या ह्या यत्नांक लागून पाकिस्तानान संवसारीक सर्तींत व्हड जैत जोडलें. एकेच मॅचींत चार शेंकड्यांची नोंद जावपाची ही पयलीच खेप आसा.
श्रीलंकेचो बॅट्समन दिलशान मदुशंकान पाकिस्तानाच्या इमाम उल हक (12) आनी बाबर आजम (10) हांकां तंबूंत धाडले. ते उपरांत मोहम्मद रिझवान आनी अब्दुल्लाह शफिक हांणी पाकिस्तानाच्या डावाक आकार दिलो. शफिकान संवसारीक सर्तींतले पदार्पणाचे मॅचींत 97 बॉलांनी शेंकडो पुर्ण केलो.
श्रीलंकेच्या मुखेल्यान बॉलिंगेंत बदल करतना मतिषा पथिराणाक बॉलिंगेक हाडलो आनी ताणें 34वे ओव्हरींत पाकिस्तानाक धपको दिलो. शफिकान 103 बॉलांनी 10 चवके आनी तीन सक्यांचे मजतीन 113 धांवड्यो करून कॅच बाद जालो. बदली खेळगडो म्हणून आयिल्ल्या हेमंथान पॉयण्टाक उत्कृश्ट कॅच धरली.
रिझवाना वांगडची ताची 176 धांवड्यांची भागिदारी सोंपली. संवसारीक सर्तीच्या इतिहासांतली ही पाकिस्ताना वतीन ही सर्वोच्च भागिदारी थारली. सईद अन्वर-वस्ती हे जोडयेन 1999त न्युझिलॅण्डा आड 194 धांवड्यांची भागिदारी केल्ली.
रिझवानाची फाट दुखताली. पांयाक क्रॅम्प आयिल्लो तरी आसतना तो मैदानांत उबो रावलो. रिझवानान 97 बॉलांनी शेंकडो पुर्ण केलो. संवसारीक सर्तींत शेंकडो मारपी रिझवान पाकिस्तानाचो दुसरो विकेटकीपर बॅट्समन थारलो. 2015त सर्फराज अहमदान आयर्लेण्डा आड नाबाद 101 धांवड्यांची खेळी केल्ली.
सौद शकील 31 धांवड्यांचें योगदान दिवन तंबूंत परतून गेलो. पूण, तो मेरेन पाकिस्ताना जैताच्या हुमऱ्यार पाविल्लो. पाकिस्तानाक 30 बॉलांनी 31 धांवड्यांची गरज आशिल्ली आनी हातींत स विकेटी बाकी आशिल्ल्यो. इफ्तिखार अहमदान 10 बॉलांनी जलद 22 धांवड्यो केल्यो. पथिराणान घाल्ले 48वे ओव्हरींत दोगांयनी 19 धांवड्यो केल्यो. रिझवानान 121 बॉलांनी णव चवके आनी तीन सक्यांचे मजतीन 134 धांवड्यो केल्यो. पाकिस्तानान 48.2 ओव्हरींनी 4 विकेटी वगडावन जैत जोडलें.
2011चे संवसारीक सर्तींत आयर्लेण्डान इंग्लंडान दिल्ली 329 धांवड्यांची मोख येसस्वी रितीन हुपिल्ली.
ते पयलीं श्रीलंकेन बॅटींग करतना 9 विकेटी वगडावन 344 धांवड्यो केल्यो. कुशल मॅण्डिस आनी पथुम निसांका (51) दुसरे विकेटी खातीर 102 धांवड्यांची भागिदारी केली. तिसरे विकेटी खातीर मॅण्डिस आनी सदीरा समराविक्रमा हांणी 69 बॉलांनी 111 धांवड्यांची भागिदारी केली. मॅण्डिसान 77 बॉलांनी 14 चवके आनी स सक्यांचे मजतीन 122 धांवड्यो केल्यो. ताणें श्रीलंके वतीन संवसारीक सर्तींत जलद शेंकडो मारलो. समराविक्रमान 89 बॉलांनी 11 चवके आनी तीन सक्यांचे मजतीन 108 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
