पाकिस्तानाचें व्हड जैत

भांगरभूंय | प्रतिनिधी

आशिया करंड सर्तीच्या उक्तावणाचे मॅचींत येजमान पाकिस्तानान दुबळ्या नेपाळ पंगडा आड व्हड जैत जोडलें. पाकिस्तानान टॉस जिखून पयलीं बॅटींग करपाचो निर्णय घेतलो. मुखेली बाबर आजम (151) आनी इफ्तिखार अहमद (109) हांच्या शेंकड्यां नेटार पाकिस्तानान 6 विकेटी वगडावन 342 धांवड्यांचो दोंगर उभारलो.

मोखीचो फाटलाव करतना नेपाळाक 23.4 ओव्हरींनी 104 धांवड्यां मेरेन मजल मारप शक्य जालें अशे तरेन ताका 238 धांवड्यांनी हार घेवची पडली. नेपाळाच्या बॅट्समनांक शादाब खानाची बॉलींग कळ्ळी ना. शादाबान 27 धांवड्यो दिवन 4 विकेटी घेतल्यो.

ते पयलीं पाकिस्तानाची सुरवात लेगीत बाबत जाल्ली. फखर जमां 14 आनी इमाम उल हक 5 धांवड्यो करून तंबूंत परतले. ते उपरांत मुखेली बाबर आजमान रिजवाना वांगडा मेळून डाव मुखार व्हेलो. रिजवानान 50 बॉलांनी 44 धांवड्यो केल्यो. आजमान 131 बॉलांनी 151 आनी इफ्तिखार अहमदान 71 बॉलांनी 109 धांवड्यो करून स्कोर 342चेर पावयलो. नेपाळा वतीन सोमपाल कमीन 10 ओव्हरींनी 85 धांवड्यो दिवन 2 विकेटी घेतल्यो. ताचे खेरीत करणान 54 धांवड्यो दिवन एक आनी लामिछानेन 69 धांवड्यांनी एक विकेट घेतली.

फाटलाव करपी नेपाळ एकदा लेगीत मोखीच्या लागसार पावतलो अशें दिसूंक ना. पयलेच ओव्हरींत शाहीन आफ्रिदीन नेपाळाक दोन धपके दिले. ते उपरांत नसीम शाहान एक विकेट घेतली. आरिफ शेखान 26 आनी सोमपालान 28 धांवड्यो केल्यो. पूण, दोगूय हॅरीस राउफाचे शिकार थारले. गुलसन 13, दपिंद्र सिंगान तीन आनी लमिछानेन शुन्याचेर बाद जालो. ते उपरांत शादार खानान आक्रमक बॅटींग करून कुशल आनी ललित हांकां बाद केले आनी नेपाळाक 104चेर आडायलो.

धांवड्यांचे बाबतींत आशिया करंड सर्तीच्या इतिहासांतलें हें व्हड जैत थारलें. हाचे पयलीं हो विक्रम भारताच्या नांवार आशिल्लो. भारतान 2008त हॉंगकॉंगाक 233 धांवड्यांनी हारयिल्लो. जाल्यार पाकिस्तानाचें वन डे क्रिकेटीच्या इतिहासांतलें तिसरें व्हडलें जैत थारलें. 2016त आयर्लेण्डाक 256 आनी 2018त झिम्बाब्वेक 244 धांवड्यांनी हारयिल्लो.