भांगरभूंय | प्रतिनिधी
संरक्षणमंत्री, लश्करी अधिकाऱ्यांची बसका, शिमेचेर तणाव
नवी दिल्ली, खबरां संस्था ः शेनवारा सांजवेळा ५ वरांचेर झूजबंदी लागू जाल्ली, पूण तीन वरां उपरांत ती पाकिस्तानान मोडली. पाकिस्तानाचें नेमकें कितें करचें, हाचेर संरक्षणमंत्री, लश्करी अधिकाऱ्यांची बसका चलता. मजगतीं, शिमेर तणाव आसा. आयज सकाळीं, जम्मू-काश्मीर, राजस्थान, पाकिस्तान शिमेक लागून आशिल्ल्या पंजाबांतल्या कितल्याशाच वाठारांत परिस्थिती सामान्य दिसून आयली. तशेंच, खबरदारी म्हणून, ह्या राज्यांच्या जायत्या भागांत रेड अलर्ट आसा. जायत्या जिल्ह्यांनी रातदीस ब्लॅकआवट आशिल्लो. मजगतीं, हें झूज आपणें मध्यस्थी करून बंद केलें, अशें ट्विट अमेरिकेचे अध्यक्ष डोनाल्ड ट्रम्प हांणी केलां. ताचेर भारतान अजून प्रतिक्रिया दिवंक ना.
शेनवारा सांजेवेळार सुमार ५ वरांचेर लागू जाल्ल्या झूज बंदीच्या वट्ट ३ वरां उपरांत पाकिस्तानान झुजां बंद मोडली. जम्मू-काश्मीर, गुजरात, राजस्थान आनी पंजाबांत ड्रोन हल्ले केले, जे भारतीय सैन्यान सोंपोवन उडयले, ही माहिती परराष्ट्र सचिव विक्रम मिस्री हांणी रातच्या ११ वरांचेर पत्रकार परिशदेंत दिली. तांणी सांगलें, पाकिस्तानान भारतीय शिमेंत घुसपाचो यत्न केलो. कांय काळा उपरांत पाकिस्तानांतल्या फारपेट आनी ड्रोन हल्ले थारले. उपरांत पयलेच फावट रातभर फारपेट वा शेलिंग जावंक ना. पहलगाम हल्ल्या उपरांत भारताच्या कारवाये उपरांत, नियंत्रण शिमेचेर पाकिस्तान सेगीत झुज बंदीचे नेम मोडल्या.
पहलगाम हल्ल्याच्या दिसा, २२ एप्रिल सावन ते १० मे मेरेन, पाकिस्तानाचे फारपेटींत ५ सैनीक शहीद जाल्यात, जाल्यार ६० जाण जखमी जाल्यात. तशेंच, २५ जाणांक मरण आयलें आनी ५० परस चड जाण जखमी जाले.
ट्रम्प हांणी झूज बंदीची म्हायती दिल्ली
अमेरिकेचे राष्ट्राध्यक्ष डोनाल्ड ट्रम्प हांणी काल सांजेवेळार ५:३० वरांचेर झूज बंदीची म्हायती दिल्ली. तांणी सोशल मिडिया प्लॅटफॉर्म एक्सचेर पोस्ट केले, ’अमेरिकेचे मध्यस्थी खाला काल रातीं जाल्ले चर्चे उपरांत म्हाका हें कळोवपाक उमेद जाता, भारत आनी पाकिस्तानान हल्ले बेगोबेग आनी पुरायेन थारावपाक सहमती दाखयली. दोनूय देशांनी एक सामान्य आनी समजिकायेन निर्णय घेतिल्ले खातीर हांव तांकां परबीं भेटयतां.
ट्रम्प हांच्या वक्तव्या उपरांत ३० मिनटांनी, परराष्ट्र सचिव विक्रम मिस्री हांणी सांजेवेळार ६ वरांचेर पत्रकार परिशद घेतली. तांणी सांगलें, दोनूय देश आतां एकमेकां आड लष्करी कारवाय करचे ना. पाकिस्तानाचे परराष्ट्र मंत्री इशाक डार हांणी युद्धबंदीक सहमती दाखयल्या. मात तीन वरां उपरांत, भारतांतल्या चार राज्यांचेर हल्लो जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
