भांगरभूंय | प्रतिनिधी
खबरां संस्था
सिडनीः आयसीसी टी-20 वर्ल्ड कपांत पाकिस्तानांत डकवर्थ लुईस नेमा प्रमाण दक्षीण आफ्रिकेक 33 धांवड्यांनी हारयलें. उपांत्य फेरयेंत प्रवेश करपाचे नदरेन म्हत्वाच्या आशिल्ले हे मॅचींत जैत मेळयल्ल्यान पाकिस्तानाचें सर्तींतलें आव्हान अजून जितें आसा. टॉस जिखून पयलीं खेळून पाकिस्तानान 20 ओव्हरींत 9 बाद 185 धांवड्यो केल्यो. पावसा उपरांत 14 ओव्हरींत दक्षीण आफ्रिकेक 142 धांवड्यो करपाचें लक्ष्य दिलें आनी हांगाक पाकिस्तानान जैताची संद घेतली.
क्विटन डी कॉक आनी रिली रोसोवू हे रोखडेच बाद जाले. डी कॉक शून्याचेर आवट जालो. रिलीन फकत 7 धांवड्यो केल्यो. तांका शाहीन आफ्रिदीन आवट करतगीर शादाब खानान दक्षीण आफ्रिकेक व्हडले धपके दिले. 19 बॉलांत 4 चौके आनी एका सक्यान 36 धांवड्यो करपी टेम्बा बवुमान आनी एडन मार्कराम (2) हांका ताणे आवट करून आफ्रिकेची स्थिती 9 ओव्हरींत 4 बाद 69 अशी केली. तेन्नाच पावस पडपाक लागलो. डकवर्थ लुईस नेमा प्रमाण आफ्रिका 17 धांवड्यांनी फाटीं आशिल्लो. पावस थांबल्या उपरांत आफ्रिके सामकार 14 ओव्हरींत 142 धांवड्यांचें लक्ष्य आशिल्लें. ते प्रमाण निमाण्या 30 बॉलांत तांका 73 धांवड्यो करपाच्यो आशिल्ल्यो.
क्लासेन आनी त्रिस्तान हांणी डाव साल्वार करपाचो यत्न केलो मात शाहिनान 15 धांवड्याचेर क्लासेनाक पॅव्हेलियनांत धाडलें, मोहम्मद वसीमान 12वे ओव्हरींत आफ्रिकेक धपको दिलो आनी तांकां 12 बॉलांत 43 धांवड्यो करपाच्यो आशिल्ल्यो तेन्ना 13 वे ओव्हरींत विकेट घेवन आफ्रिकेची हार निश्चीत केली. 6 बॉलांत 41 धांवड्यांचे कठीण लक्ष्य हातासप तांका शक्य जालें ना. 14वे ओव्हरींत हॅरीस रौफान 2 विकेटी घेतल्यो.
पाकिस्तानाची सुरवात बाबत
पाकिस्तानाच्या डावाची सुरवात बाबत जाली. मात शादाब खान आनी इप्तिकार अहमद हांणी अर्द शेंकडे करून पंगडांक 185 धांवड्यां मेरेन व्हेलें. शादाबान 22 बॉलांत 3 चौके आनी 4 सक्यांनी 52 धांवड्यांची वादळी खेळी केली. नॉर्खियान ही जोडी फोडली. मात तो मेरेन पाकिस्तानाचो डाव साल्वार जाल्लो. नॉर्खियान 4 ओव्हरींत 41 धांवड्यांत 4 विकेटी घेतल्यो. इप्तिकारान 35 बॉलांत 3 चौके आनी 2 सक्यांनी 51 धांवड्यो केल्यो. पाकिस्तानान 4 बाद 43 वयल्यान 20वे ओव्हरींत 9 बाद 185 धांवड्यो केल्यो. वेन पारनेल, कागिसो रबाडा, लुंगी एनगिडी आनी तबरेझ शमसी हाणी दरेकी एक विकेट घेतली.
दक्षीण आफ्रिकेचे हारीक लागून पंगड बी तलें चित्र बदलपाची शक्यताय वाडल्या. आफ्रिकेन ताचे निमणे मॅचींत नेदरलँडाचेर जैत मेळल्यार 7 गुणां सयत ते उपांत्य फेरयेंत पावतले. भारताची निमणी मॅच झिम्बाब्वे वांगडा आसा. तातूंत तांणी जैत मेळयल्यार 8 गुणांनी ते गुण क्रमवारींत पयले सुवातेर पावतले. अशे परिस्थितींत पंगड एत दुसरे सुवातेर आशिल्ल्या इंग्लंड व ऑस्ट्रेलिया हांतूंतल्या एक पंगडा कडेन तांकां खेळचें पडटलें.
पाकिस्ताना 6 नोव्हेंबराक बांगलादेशा कडेन खेळटलो. ही मॅच जिखल्यार ताचें 6 गुण जातले. आफ्रिका आड नेरदलँड आनी भारत आड झिम्बाब्वे ह्या मॅचींच्या निकालाचेर पाकिस्तानाचें उपांत्य फेरयेंत पावपाचो फुडार निंबून आसतलो. आफ्रिका वा भारताची हार जाल्यार बांगलादेशाचेर जैत मेळोवन पाकिस्तान उपांत्य फेरयेंत पावपाक शकतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
