पाकिस्तानाची पयली हिंदू सहाय्यक आयुक्त

भांगरभूंय | प्रतिनिधी

कराची : पाकिस्तानच्या बलूचिस्तान प्रांतातले कशिश चौधरी (२५) हिणें इतिहास रचला. ती पाकिस्तानाची पयली हिंदू महिला सहाय्यक आयुक्त जाल्या. बलुचिस्तान लोकसेवा आयोगाची कठीण परिक्षा पास ती हालींच पास जाल्ली. तिका चगाई जिल्ह्यांत सहाय्यक आयुक्त म्हणून नेमल्या. विशेश म्हणजे, ती दुर्गम आनी अशांत नोशकी शारांतली रहिवाशी. “हांव म्हज्या समुदाया खातीर आनी खास करून बायलां खातीर प्रेरणा जावपाक सोदतां,” अशें कशिश हांणी सांगलें.

कोण ही कशिश चौधरी?

कशिश चौधरी ही बलूचिस्तानांतल्या चगाई जिल्ह्यातल्या नोशकी गांवांत रावता. हिंदू अल्पसंख्याक समुदायांतले कशिश हांणी मेहनत, जिद्दीन बलूचिस्तान लोकसेवा आयोगाचे परिक्षेंत यश मेळयलें. पिरायेच्या २५ व्या वर्सा सहाय्यक आयुक्त पद मेळोवन तिणें एक नवो आदर्श निर्माण केला.
बलूचिस्तान हो पाकिस्तानाचो सगल्यांत व्हडलो, पूण कमी लोकसंख्या आशिल्लो वाठार. हांगा बंडखोरी, आतंकवाद आनी समाजीक- अर्थीक आव्हानांक लागून परिस्थिती सदांच तणावाची आसता. हांगाच्या हिंदूं सारक्या अल्पसंख्याकांक अडचणींक तोड दिवचें पडटा. “हे परिस्थितींतूय शिक्षण आनी मेहनत यश मेळोवन दिवपाक शकता,” अशें कशिश हांचें मत.
कशिश हांचें यश पाकिस्तानांतल्या अल्पसंख्याक, खास करून हिंदू आनी महिलां खातीर एक व्हडलो पांवडो आसा. तिच्या येशाक लागून हेर तरणाट्यांक शिक्षण आनी मेहनती वरवीं व्हडलीं सपनां साकार करपाची प्रेरणा मेळटली. “हांव म्हज्या कामांतल्यान समाजांत सकारात्मक बदल घडोवपाक सोदतां. म्हाका नोशकी आनी बलूचिस्थानाच्या लोकांक मजत करपाची आसा,” अशें कशिश हांणी सांगलें.
कशिश हांणी दोन दिसां पयलीं सहाय्यक आयुक्त म्हणून जापसालदारकी स्वीकारली. तिचे कामगिरी कडेन आतां सगल्यांचें लक्ष आसा.

आठ वरां अभ्यास

कशिश हिचो बापूय वेपारी. तांणी सांगलें, फाटलीं तीन वर्सा ती सद्दां आठ वरां अभ्यास करताली. ती समाजसेवाय करता. बलूचिस्तानाचे मुख्यमंत्री सरफराज बुगती हांणी तिची भेट घेवन ती हो वाठार आनी पुराय देशा खातीर अभिमानाचें प्रतिक आसा, अशें सांगलें.
कशिशा पयलीं मनेश रोपता ही २०२२ त कराचीची पयली हिंदू महिला एसपी जाल्ली. तर सुमन पवन बोदानी ही २०१९ त शाहदादकोटाची पयली हिंदू महिला सिव्हील जज जाल्ली. जीं शिकलीं तीं सगलींच मुखार पावलीं, अशें सिंधाचे राजकी फुडारी रमेशकुमार वकवानी हांणी सांगलें.