भांगरभूंय | प्रतिनिधी
पाकिस्तान क्रिकेट पंगडान संवसारीक वन डे क्रिकेट सर्तींत तिसऱ्या जैताची नोंद करतना आव्हान कायम राखलें. बांगलादेशा आडचे मॅचींत ताणें 7 विकेटींनी झणझणीत जैत जोडून नेट रन रेटींत बरीच सुदारणां केली आनी हाचो फायदो ताका सेमी फायनलीचें गणीत सोडोवपाक जातलें.
दुसरे वटेन बांगलादेशाचें निमाण्या चारांत सुवात मेळोवपाचें सपन भंगलें. पाकिस्तान आतां स गुणां सयत गुणतकट्यांत पांचवे सुवातेर पावला. ताच्यो दोन मॅची बाकी आसात. 4 नोव्हेंबराक तो न्युझिलॅण्डा आड खेळटलो जाल्यार णववी आनी निमाणी मॅच 11 नोव्हेंबराक इंग्लंडा आड खेळटलो. पाकिस्तानाक ह्यो दोनूय मॅची जिखपाकूच जाय. तशेंच हेर पंगडांच्या प्रदर्शनाचेर लेगीत ताका निंबून रावचें पडटलें.
इमाम-उल-हकाचे सुवातेर संद मेळिल्ल्या फखर जमानान अब्दुल्लाह शफीक सयत बांगलादेशाच्या बॉलरांनी बरीच फोडून काडली. पाकिस्तान हे मॅची पयलीं गुणतकट्यांत -0.39 नेट रन रेटी सयत सातवे सुवातेर आशिल्लो. ताका दोन गुणां सयत नेट रन रेटींत बरीच सुदारणां करपा खातीर ही मॅच बेगीन जिखपाक जाय आशिल्ली. त्याच निर्धारान जमान आनी शफीक हांणी आक्रमक बॅटींग केली. शफीकान 56 बॉलांनी आनी जमान हाणें 51 बॉलांनी अर्द शेंकडे पुर्ण केले आनी पयले विकेटी खातीर शेंकड्याची भागिदारी पुर्ण केली. 22वे ओव्हरींत मेहिदी मिराजान ही जोडी फोडली. शफीक 9 चवके आनी दोन सक्यांचे मजतीन 68 धांवड्यांचेर एलबीडब्ल्यू बाद जालो.
शफीकान अंदूंचे संवसारीक सर्तींत चवथे खेपे 50 परस चड धांवड्यो केल्यो. ताणें एकेच संवसारीक वन डे क्रिकेट सर्तींत चारा परस चड 50+ धांवड्यांची खेळी करपी मिस्बाह उल हक (2015) आनी बाबर आजम (2019) हांचे कडेन बरोबरी सादली. जावेद मियांदादान 1992त पांच खेपे 50+ परस धांवड्यो केल्ल्यो.
शफीकाची विकेट पडल्या उपरांत लेगीत जमानान आपली आक्रमक बॅटींग कायम राखली. मुखेली बाबर आजम (9) सको मारपाच्या यत्नांत मिराजाच्या बॉलाचेर कॅच बाद जालो. जमान 74 बॉलांनी तीन चवके आनी सात सक्यांचे मजतीन 81 धांवड्यो करून मिराजाच्या बॉलाचेर बाद जालो.
इफ्तिखार अहमद (17) आनी मोहम्मद रिझवान (26) हाणें आक्रमक बॅटींग करून पाकिस्तानाचें जैत निश्चीत केलें. पाकिस्तानान 32.3 ओव्हरींनी 3 विकेटी वगडावन 205 धांवड्यो करून जैत जोडलें.
सेमी फायनलींतली सुवात आस्त राखपा खातीर बांगलादेशा लेगीत ही मॅच जिखपाची गरज आशिल्ली. पूण, ताका तशें करप शक्य जालें ना. लिटन दासान 45, महमुदुल्लाहान 56 आनी शाकिब अल हसनान 43 धांवड्यांची खेळी केली. मेहिदी हसन मिराजान 25 धांवड्यांचें योगदान दिलें. बांगलादेशाचो डाव 45.1 ओव्हरींनी 204 धांवड्यांचेर सोंपलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
