भांगरभूंय | प्रतिनिधी
एस-400 संरक्षण प्रणाली येसस्वी
पाकिस्तानी हवाई संरक्षण प्रणाली नश्ट
इझ्रायली हार्पी ड्रोनाचो वापर
खबरां संस्था
नवी दिल्ली : ऑपरेशन सिंदूर उपरांत दुसऱ्या दिसा म्हणल्यार बुधवारा- बिरेस्तारा रातीं पाकिस्तानान 15 परस अदीक भारतीय लश्करी तळांचेर हल्लो करपाचो यत्न केलो. रशिया कडल्यान मेळिल्ल्या एस-400 संरक्षण प्रणालीच्या माध्यमांतल्यान भारतान हो हल्लो फुस्स केलो. हाका परतून जाप दितना बिरेस्तारा सकाळीं भारतान पाकिस्तानाची हवाई संरक्षण प्रणाली नश्ट केली. ते खातीर इझ्रायला कडल्यान मेळिल्ल्या हार्पी ड्रोनाचो वापर केलो.
संरक्षण मंत्रालयान बिरेस्तारा दनपारां 2.30 वरांचेर सांगलें, पाकिस्तानान उत्तर आनी अस्तंत भारतांतल्या शारांक लेगीत लक्ष्य केले. ह्या काळांत अवंतीपोरा, श्रीनगर, जम्मू, पठाणकोट, अमृतसर, कपूरथला, जालंधर, लुधियाना, आदमपूर, भटींडा, चंदीगड, नल, फलोदी, उत्तरलाई आनी भूज ह्या वाठारांनी ड्रोन आनी क्षेपणास्त्रां सोडलीं. ती लेगीत वयले वयर काबार केलीं.
भारतीय लश्करान रशिया कडल्यान मेळयल्ली एस-400 हवाई संरक्षण क्षेपणास्त्र प्रणाली आदीच शिमेर तैनात केल्या. पाकिस्तानान क्षेपणास्त्रांनी हल्लो करताच ही प्रणाली सक्रीय केली.
संरक्षण मंत्रालयान सांगलें, बिरेस्तारा सकाळीं पाकिस्तानान केल्ल्या हल्ल्या उपरांत भारतीय सशस्त्र दळांनी पाकिस्तानांतल्या खूबश्या वाठारांत हवाई संरक्षण रडार आनी प्रणालींक लक्ष्य करचे खातीर हार्पी ड्रोनाचो वापर केलो.
भारताची कारवाय पाकिस्तानाच्याच वाठारांत आनी तेच गतीन केली. लाहोर, सियालकोट, कराची वाठारांतली हवाई संरक्षण प्रणाली नश्ट जाल्याचें सुत्रांनी सांगलें.
मजगतीं, पाकिस्तान नियंत्रण रेशेचेर (एलओसी) फारपेट करता. तातूंत जम्मू- क्स्मीरांतल्या कुपवाडा, बारामुल्ला, उरी, पूंछ, मेंढर आनी राजौरी सेक्टरांत मोर्टार शेलींग आनी फाटपेट करता. 6 मेक उसरां रातीं भारतान पाकिस्तान आनी पीओकेंतल्या णव आतंकवादी तळांचेर क्षेपणास्त्रांनी हल्लो केल्लो.
एस-400 प्रणालीची तांक 600 किमि मेरेन
एस-400 ही एक हवाई संरक्षण प्रणाली आसा. ही हवेंतल्यान जावपी हल्ले आडायता. दुस्मान देशांचीं क्षेपणास्त्रां, ड्रोन, रॉकेट लाँचर आनी झुजां विमानांचे हल्ले आडावपा खातीर ही प्रभावी आसा. ही यंत्रणा 600 किलोमिटर मेरनच्या लक्ष्याची फाट धरपाक शकता आनी ताची लक्ष्य मारपाची श्रेणी 400 किलोमिटर आसा. रशियाच्या अल्माझ सेंट्रल डिझायन ब्युरोन ती केल्या आनी संवसारांतल्या आधुनीक हवाई संरक्षण प्रणालींत ताची मेजणी जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
