भांगरभूंय | प्रतिनिधी
आशिया करंड क्रिकेट सर्तीचे चवथे मॅचींत पाकिस्तानान दुबळ्या ओमान पंगडाक 93 धांवड्यांनी हारायलो. दुबय आंतरराष्ट्रीय क्रिकेट स्टेडियमाचेर जाल्ले मॅचींत पाकिस्तानान पयलीं बॅटींग करतना 7 बाद 160 धांवड्यो केल्यो आनी उपरांत ओमानाचो डाव 16.4 ओव्हरींनी 67 धांवड्यांचेर सोंपयलो.
पाकिस्ताना मुखार ओमानाक तग धरपाक जमलो ना. ताच्या फकत तीन बॅट्समनांक दोट्टी आंकडो हुपपाक जमलो. मदले फळेंतलो बॅट्समन हम्मद मिर्झान सगल्यांत चड 27 धांवड्यो केल्यो.
पाकिस्ताना वतीन सायम अयुब, सुफियान मुकीम आनी फहिम अश्ररफ हांकां दरेकी 2 विकेट फावो जाल्यो. जाल्यार शाहिन आफ्रिदी, अबरार अहमद आनी मोहम्मद नवाझ हांणी एकेक विकेट घेतली.
ते आदीं टॉस जिखून पाकिस्तानान पयलीं बॅटींग करपाचो निर्णय घेतलो. पूण, आमिर कलीम (3 विकेटी) आनी शाह फैझल (3 विकेटी) हांचे उत्कृश्ट बॉलिंगेक लागून पाकिस्तानाक 7 बाद 160 धांवड्यो करप शक्य जाल्यो.
पाकिस्तानाची सुरवात बरी जाली ना. पयलेच ओव्हरींत शाह फैझलान सॅम अयूब (0) हाका बाद केलो.
ते उपरांत बॅटिंगेक आयिल्ल्या मोहम्मद हॅरिसान साहिबजादा फरहान वांगडा मेळून डाव सांबाळ्ळो. दोगांयनी दुसरे विकेटी खातीर 85 धांवड्यांची भागिदारी केली. 11वे ओव्हरींत आमिर कलीमान साहिबजादा फरहानाक (29) बाद करून ही जोडी फोडली.
ते उपरांत बॅटिंगेक आयिल्ल्या फखर जमानान मोहम्मद हॅरिसा वांगडा मेळून डाव मुखार व्हरपाचो यत्न केलो. पूण, 13वे ओव्हरींत आमिरान मोहम्मद हॅरिसाक बोल्ड करून पाकिस्तानाक व्हड धपको दिलो. हॅरिसान 43 बॉलांनी सात चवके आनी तीन सक्यांचे मजतीन 66 धांवड्यो केल्यो. ते उपरांत आमिरान फुडल्याच बॉलाचेर मुखेली आगा सलमान (0) हाका बाद केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
