भांगरभूंय | प्रतिनिधी
पाकिस्तान पंगडान अखेरेक संवसारीक टी-20 क्रिकेट सर्तींतलें आपलें पयलें जैत जोडपाक येस मेळयलें. दुबळ्या कॅनडा आड ताणें जैत जोडलें. पूण, हें जैत ताका चड फायद्याचें थारचें ना. सेगीत दोन हारींक लागून पाकिस्तानाची नेट रन रेट मायनसांत गेल्या. ताका लागून उरिल्ल्यो दोन मॅची व्हडा फरकान जिखपाची गरज आशिल्ली.
कॅनडान दिल्ली 107 धांवड्यांची मोख ताणें 14 ओव्हरी भितर मेळयिल्ली, जाल्यार ताची रन रेट बरीच सुदारतली आशिल्ली. पूण, मोहम्मद रिझवान आनी बाबर आजम हांचे सावकाश बॅटिंगेन करून घात केलो.
पाकिस्तानाच्या बॉलरांनी कॅनडा आड उत्कृश्ट बॉलींग घाली. मोहम्मद आमीर (2-13) आनी हॅरीस रौफ (2-26) हांणी दरेकी 2 विकेटी घेतल्यो. जाल्यार शाहीन आफ्रिदी आनी नसीम शाह हांणी दरेकी एक विकेट घेतली. कॅनडाचो ओपनर अॅरोन जॉन्सन हाणें पाकिस्तानाच्या बॉलरांक येसस्वी रितीन तोंड दिलें. ताणें 44 बॉलांनी चार चवके आनी चार सक्यांचे मजतीन 52 धांवड्यो केल्यो.
कॅनडान 20 ओव्हरींनी 7 बाद 107 धांवड्यो केल्यो. कलीम सना (13) आनी मुखेली साद बीन जाफर (10) हांकां सोडले जाल्यार हेरांक दोट्टी आंकडो लेगीत हुपपाक जमलो ना.
पाकिस्तानान हे मॅची खातीर ओपनरांची जोडी बदल्ली, तरी लेगीत तांकां अपेस आयलें. सईम अयुब (6) हाका पांचवे ओव्हरींत डिलॉन हेलिगरान बाद केलो. नेट रन रेट (-0.150) सुदारपा खातीर पाकिस्तानाक ही मॅच 14 ओव्हरींनी जिखपाक जाय आशिल्ली. पूण, कॅनडाच्या बॉलरांनी पाकिस्तानाच्या बॅट्समनांक बांदून दवरले. मोहम्मद रिजवान आनी बाबर आजम ही अणभवी जोडी मैदानांत आशिल्ली. पूण, तांकां अपेक्षीत धांवगती राखपाक जमूंक ना.
पाकिस्तानान 10 ओव्हरींनी 1 बाद 59 धांवड्यो केल्यो. रिजवान आनी बाबर आजम हांकां अर्द शेंकड्याची भागिदारी पुर्ण करपाक 52 बॉल खेळचे पडले.
कॅनडाची बॉलींग आनी फिल्डींग उत्कृश्ट थारली. 15वे ओव्हरींत 61 बॉलांनी 63 धांवड्यांची भागिदारी फोडपाक कॅनडाच्या हेलिगराक येस आयलें.
बाबर 33 बॉलांनी 33 धांवड्यो करून बाद जालो.
रिजवानान 52 बॉलांनी अर्द शेंकडो पुर्ण केलो. पाकिस्तानान 17.3 ओव्हरींनी 3 विकेटी व्हगडावन 107 धांवड्यो करून जैत जोडलें. रिजवान 53 धांवड्यांचेर नाबाद उरलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
