भांगरभूंय | प्रतिनिधी
भारत पंगडान पाकिस्तानाक पॅनल्टी शुटआवटांत 6-4 अशा गोल फरकांनी हारोवन दादल्यांची पयली आशियायी हॉकी 5एस संवसारीक करंड पात्रताय सर्त जिखली. नियमीत वेळाच्या खेळांत दोनूय पंगड 4-4 अशे बरोबरींत उरिल्ल्यान निकाल लावपाक शुटआवटाचो आदार घेवचो पडलो. हातूंत भारतान जैत मेळयलें.
एका वेळार भारत फाटीं आशिल्लो. पूण, अखेरच्या खिणाक बरोबरीचो गोल केलो. मजगतीं, फुडल्या वर्सा ओमानांत जावपी संवसारीक हॉकी 5एस सर्ती खातीर भारत आनी पाकिस्तान दोनूय पंगड पात्र जाल्यात.
ते पयलीं भारतान मोहम्मद रहीलाच्या गोलां नेटार सेमी फायनलींत मलेशिया पंगडाक 10-4 अशा फरकांनी हारोवन फायनलींत सुवात मेळयली. रहीलान म्हत्वाचे मॅचींत चार गोल केले. ताणें णववे, 16वे, 24वे आनी 28वे मिनटाक गोल केलो. ताचे खेरीत मनिंदर सिंग (दुसरें मिनट), पवन राजभर (13वें मिनट), सुखविंदर (21वें मिनट), मनदीप मोर (22वें मिनट), जुगराज सिंग (23वें मिनट) आनी गुरजोत सिंग (29वें मिनट) हाणें भारताच्या जैतांत एकेक गोल केलो. मलेशिया वतीन अखीमुल्लाह अन्वर (सातवें, 19वें मिनट) हाणें दोन गोल केले. जाल्यार अबू इस्मायल (4थें मिनट) आनी दीन मोहम्मद (19वें मिनट) हाणें एकेक गोल केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
