भांगरभूंय | प्रतिनिधी
टॅस्ट माळ 0-0 अशी बरोबरींत सोडयल्या उपरांत येजमान पाकिस्तानान न्युझिलॅण्डाक पयले वन डे मॅचींत 6 विकेटींनी हारयलो. न्युझिलॅण्डान दिल्ली 256 धांवड्यांची मोख पाकिस्तानान 48.1 ओव्हरींनी मेळयली. विकेटकीपर बॅट्समन मोहम्मद रिजवान, मुखेली बाबर आजम आनी ओपनर फखर जमान हांणी अर्द शेंकडे मारले.
पांच विकेटी घेवपी नसीम शाहाची मॅन ऑफ द मॅच पुरस्कारा खातीर निवड जाली. तीन मॅचींचे माळेंतली दुसरी मॅच 11 जानेवारीक कराचीच्या नेशनल स्टेडियमांत जातली.
ते आदीं टॉस हारल्या उपरांत पयलीं बॅटींग करपी न्युझिलॅण्डाची सुरवात बरी जाली ना. पयलेच ओव्हरींत ओपनर डॅव्हॉन कॉन्वेक नसीमान गोल्डन डकाचेर बोल्ड केलो. मुखेली केन विलियम्सन (26) हाणें एलन वांगडा मेळून 37 धांवड्यांची भर घाली. पूण, एलन लेगीत 29 धांवड्यो केल्या उपरांत बाद जालो.
मदले फळयेंतले बॅट्समन डॅरील मिचेलान 36, विकेटकीपर बॅट्समन टॉम लॅथमान 42, ग्लॅन फिलिप्सान 37, मिचेल सेंटनरान 21 आनी टिम सावथीन 15 धांवड्यांचें योगदान दिलें.
पाकिस्तानाच्या जबरदस्त बॉलिंगे मुखार न्युझिलॅण्डाक 50 ओव्हरींनी 9 विकेटी वगडावन 255 धांवड्यो करप शक्य जाल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
