भांगरभूंय | प्रतिनिधी
पाकिस्तानान येजमान श्रीलंका पंगडा आडची दुसरी टॅस्ट डाव आनी 222 धांवड्यांनी जिखून दोन मॅचींची माळ 2-0 अशी बोल्सांत उडयली. पयली टॅस्ट 4 विकेटी जिखल्या उपरांत पाकिस्तानान दुसरे टॅस्टीचेरूय आपलो शेक दवरतना चवथ्याच दिसा जैत जोडलें. ह्या जैत सयत पाकिस्तानान इतिहास घडयलो. पाकिस्तानान विदेशी भुंयेर आतां मेरेन जोडिल्लें हें सगल्यांत व्हड जैत थारलें. हाचे पयलीं 2011त बांगलादेशाचे भुंयेर आपल्या क्रिकेट इतिहासांतलें व्हड जैत जोडिल्लें. बांगलादेशाक डाव आनी 184 धांवड्यांनी हारयिल्लो.
श्रीलंकेचो पयलो डाव 166चेर गुठलायल्या उपरांत पाकिस्तानान आपलो पयलो डाव 5 विकेटी वगडावन 576 धांवड्यो करून घोशीत केलो आनी 410 धांवड्यांची व्हड आघाडी घेतली.
नोमान अलीचे स्पिन बॉलिंगे मुखार पाकिस्तानाचें कांयच शाणपण चलूंक ना आनी ताचो दुसरो डाव 188चेर सोंपलो. अणभवी बॅट्समन अॅंजेलो मॅथ्यूजान 127 बॉलांनी सात चवके आनी दोन सक्यांचे मजतीन नाबाद 63 धांवड्यो केल्यो. ताका दुसरे वटेच्यान एकाय बॅट्समनान साथ दिली ना. ते पयलीं पाकिस्तानान दिसाचे सुरवातीक मोहम्मद रिझवानाचो (नाबाद 50) अर्द शेंकडो पुर्ण जाल्या उपरांत डाव घोशीत केलो.
श्रीलंकेच्या ओपनरांनी 69 धांवड्यांची भागिदारी करून बरी सुरवात केल्ली. पूण, नोमान अलीन रोखडेंच स्पिन बॉलिंगेच्या जाळांत श्रीलंकेच्या बॅट्समनांक फारायले. ओपनर निशान मदुशंका (33) आनी दिमुथ करुणारत्ने (41) बाद जाल्या उपरांत अॅंजेलो मॅथ्यूजान एक बाजू सांबाळून धरली. पूण, नोमानान दुसरे वटेच्यान एकेक विकेट मेळयत गेलो.
श्रीलंकेचो सात विकेटी 177चेर घेतल्या उपरांत एका डावांत 10 विकेटी घेवपाच्या विक्रमा कडेन बरोबरी करपाची बरी संद नोमाना कडेन आशिल्ली. पूण, नसीम शाहान तशें जावपाक दिलें ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
