भांगरभूंय | प्रतिनिधी
खबरां संस्था
नवी दिल्लीः वन-डे वर्ल्ड कप क्रिकेट सर्त भारतांत 5 ऑक्टोबर ते 3 नोव्हेंबर मजगतीं जातली. चवथे फावट ही सर्त भारतांत खेळयतले. मात हे फावट भारत एकलोच हे सर्तीचो येजमान आसतलो. हाचे पयलीं पाकिस्तान, श्रीलंका वा बांगलादेश सर्तीचे जोड येजमान आशिल्ले. सर्त सुरू जावपा खातीर पांच म्हयन्यां परस उणो वेळ आसा. मात सर्ताचें वेळापत्रक अजून जाहीर केल्लें ना. हाका सगल्यांत व्हडलें कारण पाकिस्तान आसा.
पाकिस्तान क्रिकेट मंडळान (पीसीबी) वर्ल्ड कपाच्या एक न्हय जाल्यार तीन मॅचींच्या वेळापत्रकाचेर आक्षेप घेतला. बीसीसीआयन आंतरराष्ट्रीय क्रिकेट परिशदेक (आयसीसी) धाडिल्लो वेळापत्रकाचो मसुदो पाकिस्तानान मानून घेतलो ना. तीन मॅचीच्या वेळापत्रकांत बदल करपाची मागणी तांणी केल्या.
खबरे प्रमाण पीसीबीन अहमदाबाद हांगा जावपी भारत- पाकिस्तान, चेन्नयत जावपी पाकिस्तान- अफगाणिस्तान आनी साखळे फेरयेंत बंगळुरूंत जावपी पाकिस्तान- ऑस्ट्रेलिया हे मॅचींच्या सुवांतीचेर आक्षेप घेतला. बीसीसीआयन हे मुद्दम केलां असो पाकिस्तानाचो आरोप आसा. भारतान सुरक्षेच्या कारणा खातीर आशिया करंप 2023 खातीर पाकिस्तानांत वचपाक न्हयकार दिला. अशें स्थितींत पाकिस्तान लेगीत भारतांय येवपाक न्हयकार दिवपाक शकता.
पाकिस्तानान अफगाणिस्तान आनी ऑस्ट्रेलिये आडचे मॅचींची चेन्नय आनी बंगळुरू व्हो सुवातो बदलपाची मागणी केल्या. भारतना आमच्यो मॅची मुद्दम थंय दवोरल्यात. पाकिस्तान पंगडाक खेळपट्टीचो, सराव सुविधा आनी येरादारी वेवस्थे कडेन संबंदीत आव्हानांत तोड दिवपाक पडटलें असो पीसीबीचें म्हणणे आसा. पीसीबी प्रमाण चेन्नयची खेळपट्टी स्पिनरां खातीर बरी आसा. हे खेळपट्टेर अफगाणिस्तान पाकिस्तानात भारी पडपाक शकता
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
