भांगरभूंय | प्रतिनिधी
पेहलगाम देगणांत जाल्ल्या ह्या क्रूर हल्ल्याचे पडसाद आतां आयकुपाक येवंक लागल्यात. दीस वतले तसो राजनितीक घडणुकांक वेग येत रावतलो. सरकार आक्रमक भुमिकेंत आसा. विरोधकांनीय सरकाराच्या सगल्या निर्णयांक तेंको जाहीर केला. दुख्खाची, तिडक येवपा सारकी ही घडणूक. सरकारान हें प्रकरण मुत्सदीगिरीन हाताळून पाकिस्तानाचें पेंगट मोडपाक जाय. साँप भी मरे और लाठी भी ना तुटे, पद्दतीन. देवाचे बडयेक आवाज नासता, ती सप्प करून फाटीर पडटा, तेन्नाच कळटा. धर्माक वेंगायिल्लो पाकिस्तान वेगळें राष्ट्र जायत सावन भारताची कळ काडीत आसा. आनीक कितलीं वर्सां म्हूण ही नखलामी सोंसून
घेतले?
नाक दामलें काय तोंड उक्तें जाता. पाकिस्तानाची परिस्थिती सध्या तशीच जाल्या. भारत सरकारान काल बरेच म्हत्वाचे निर्णय घेतले. रोखडेच पाकिस्तानानूय घेतले. हे आतंकवादी आपले न्हयच, असो तांचो दावो. पाकिस्तानी नागरिकांक भारतांत येवपाक व्हिसा दितात, ती भारतान बंद केल्या. जे कोण भारतांत आसात, तांणी 27 एप्रील मेरेन आनी वैजकी व्हिसाचेर आयिल्ल्यांनी 29 एप्रील मेरेन देश सोडचो अशे आदेश दिल्यात. भारतीयांनी पाकिस्तानाचे भोंवडेर वच्चे न्हय, अशे सांगलां. खास करून शिख भाव- भयणी गुरू नानकांचें जल्मथळ नानकाना साहिबाक वतात. भारतांतल्या पाकिस्तानी उच्चायुक्तांतल्या लश्करी सल्लागारांक सात दिसां भितर भारत सोडपाक सांगला. इस्लामाबादांतल्या भारतीय अधिकाऱ्यांकूय आपयल्यात. पाकिस्तान सरकाराच्या एक्स हॅण्डलाचेर बंदी घाल्या. खरें म्हणल्यार पाकिस्ताना कडले समाजीक, अर्थीक, संस्कृतीक संबंद तोडपाचो
वेळ आयला.
पाकिस्तानानूय भारता वांगडच्यो सगल्यो द्विपक्षीय कबलाती रद्द केल्यात. वाघा शीम बंद केल्या. शीख यात्रेकरू सोडल्यार हेर भारतीयांचे व्हिसा रद्द केल्यात. थंय आयिल्ल्या भारतीय नागरिकाक, उच्चायुक्तांतल्या अधिकाऱ्यांक भारतांत वचपाक सांगलां. तांच्या कर्मचाऱ्यांचो आंकडो उणो करून 30 चेर हाडला. विमानां, वेपार स्थगीत केला. मात हातूंत शिमला कबलात सगल्यांत म्हत्वाची. 2 जुलय 1972 दिसा ती जाल्ली. प्रधानमंत्री इंदिरा गांधी आनी झुल्फिकार अली भुत्तो हांच्यो ताचेर सयो आसात. ताचे वर्सभर पयली पाकिस्तान झूज हारिल्लो. दोनूय देश एकमेकां आडची कसलीय समस्या, प्रस्न शांतिकायेन सोडयतले. झूज वा बळाचो वापर करचे नात, अशी ती कबलात. सध्या भारतान 1960 तली सिंधू कबलात स्थगीत दवरपाचें थारायलां. सिंधू उदक कबलाती प्रमाण, सिंदू न्हंय आनी तिच्या उपन्हंयांचे दोनूय देशां मदीं वांटप जालां. पूर्वेच्या सतलज, बियास आनी रावी ह्या न्हंयांच्या उदकाचेर भारताचो हक्क आसा. तर पश्चिमे कडल्या सिंधू, चिनाब आनी झेलम ह्या न्हंयांच्या उदकाचेर पाकिस्तानाचें नियंत्रण. कबलाती प्रमाण भारताक 16 टक्के उदक मेळटा, तर पाकिस्तानाक 84 टक्के. भारतांतल्यान तेवटेन वचपी न्हंयांचे उदक आमी आडायत जाल्यार पाकिस्तानाक ‘मेघा पानी दे’ करीत हेडचें पडटलें. ही कबलात स्थगीत दवरल्यार तो कायद्या प्रमाण झूज गुन्यांव मानतले, अशें पाकिस्तानान म्हणलां. ही स्थगिती आमकां मान्य ना, उदक बंद केल्यार आमी प्रत्युत्तर दितले, अशेंय तांणी म्हणलां. भारताचे तुळेन सगल्या मळांचेर फाटल्यान आशिल्ल्या पाकिस्तानांतल्या मूठभर धर्मांध लोकांनी, आतंकवाद्यांनी इतलीं वर्सां जें कितें केलें, तो झूज गुन्यांव थारना? पाकिस्तानान हाचो विचार करपाक जाय.
आतंकवाद्यांचे कल्पने परस व्हडली ख्यास्त आमी दितले. धर्तरेच्या निमण्या कोनशा मेरेन आमी तांकां धांवडावन घालतले. आतंकवादाक लागून भारताचो आत्मो केन्नाच तुटचोना, अशें प्रधानमंत्री नरेंद्र मोदी हांणी म्हणलां. भारत कितें तरी व्हडलें करतलो, असो दुबाव रशियेंतल्या खबरांपत्रांनी उक्तायला. आतंकवाद्यांनी धर्म विचारून ह्या हल्ल्याक धर्मीक वळण लायलें म्हूण सुज्ञ नागरिकांनीय थळाव्या भारतीयांक त्रास जातले, अशें पावल उखलप धोक्याचें थारतलें. ह्या हल्ल्यांत एका थळाव्या मुस्लिमाक मारला, तर कांय जाण जखमी जाल्यात. घोड्यांचे धनी जखमी पर्यटकांक फाटीर मारून दोंगरा वयल्यान सकयल हाडटना, थळावे आपल्या घरांनी आसरो दितनाचे व्हिडियो, फोटो व्हायरल जाल्यात…. हे घडणुकेक लागून काश्मिरांतलें पर्यटन परत बंद पडटलें. हल्ल्याचो धपको निश्पाप पर्यटकांक बसलो, तसोच थळाव्या वेपारी, वेवसायिकांक आतां बसतलो.
निवृत्त लश्करी अधिकाऱ्यांच्या मतान, काश्मिरांतले सुरक्षे खातीर दवरिल्लें सैन्य उणें केल्लें. हल्लो जालो ते दीस पहलगामांत सकयल आनी वयर दोनूय कडेन एक पसून सुरक्षा रक्षक नाशिल्लो. हें खुद्द पर्यटक सांगतात. कितलीं व्हडलीं घाळपणां ही? हांगाची सुरक्षा वेवस्था कोणाच्या हातांत आसा? गुप्तचर संघटणेक ह्या हल्ल्याची सुलूस कशी लागूंक ना? शस्त्रां घेवन इतले आतंकवादी काश्मीराच्या मदल्या वाठारांत कशे पावले?…… आनी आतां गेले खंय? एकलोय कसो मेळूंक ना? पाकिस्तानाच्या लश्कर ए तैबान हल्ल्याची जापसालदारकी घेतल्या. कॅमेरो आशिल्लें हॅल्मेट घालप, धर्म विचारप, अत्याधुनीक अॅप वापरप… ही शैली हमासाची. म्हणटकच ह्या हल्ल्या फाटल्यान तांचो हात आसा काय तांणी प्रशिक्षण दिल्लें, हाचो सोद भारतीय गुप्तचर संघटणेक घेवचो
पडटलो.
ह्या हल्ल्यान पुराय देश हादरून गेला. आतां आमी राजकी, प्रशासकी डावपेच आंखून पाकिस्तानाक हालोवन उडोवपाक जाय. तेंय बी जाता तितले
बेगीन.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
