भांगरभूंय | प्रतिनिधी
पाकिस्ताना आड भारतान पांच स म्हयन्यां भितर आनीक एक झूज जिखलें. हें झूज शिमेर जावंक नासलें. जाल्यार तें दुबयंतल्या एका स्टेडियमार जालें. पूण ताचे स्वरूप झुजाचे तुळेन मात लेगीत उणें आशिल्लें अशें म्हणूंक येवचें ना. खरें म्हणल्यार मैदानार जाल्ल्या ह्या झुजांत भारतीयांची प्रतिश्ठा आनीक पणाक लागिल्ली. ऑपरेशन ‘सिंदूर’ चें झूज आमच्या सैनिकांनी पांच स म्हयन्यां पयलीं एकाहातान जिखून दिल्लें. त्या झुजांत हुलपल्ल्या पाकिस्तानाक मात्शें मलम लावपा खातीर मैदानार लेगीत आसूं पूण जैताची गरज आशिल्ली. पूण थंय लेगीत आमच्या खेळगड्यांनी तांची दाळ शिजूंक दिली ना. पहलगामातल्या आतंकवादी हल्ल्या उपरांत सुरू केल्लें ऑपरेश ‘सिंदूर’ कारवायेंत आमच्या सैनिकांनी जसो बदलो घेतलो तीच आक्रमकताय सेगीत दोळ्यां मुखार दवरून भारतीय पंगडान पाकिस्तानाक मैदानारूय लोळोवन मारलो. ऑपरेश सिंदूर’ हे कारवायेंत जें कितें उणें आशिल्लें ताची कळंतरा सयत भरपाय सूर्यकुमार यादव आनी ताच्या खेळगड्यांनी मैदानार केली. ‘सिंदूर’ कारवायेंत सगलें कितें व्हगडावन लेगीत आमीच भारताक वरचड थारिल्ल्याचे धोल बडोवन संवसारभर सांगपाचें काम पाकिस्तान करीत आसतना आशिया करंड क्रिकेट सर्तींत कशे तरी फायनलींत पावून खेळपाची मेळिल्ली संद सादून भारताचेर जैत जोडून आनी ताचेंय राजकी भांडवल करपाचो पाकिस्तानाचो यत्न भारतीय खेळगड्यांनी मातयेभरवण केल्ल्यान ते अभिनंदनाक पात्र आसात.
मैदाना वेली हार-जैत हो एक खेळाचोच भाग अशें म्हणून स्विकारप आसता. पूण पाकिस्तान आनी भारत हे पंगड खंयचेय सर्तींत एकामेका मुखार येत जाल्यार तो फक्त खेळ उरना जाल्यार ताका झुजाचें स्वरूप येता हो इतिहास आसा. आंतरराष्ट्रीय क्रिकेट सर्तींत ह्या दोन पंगडां मदली दुस्मानकाय अशा थराक पावल्या की तांचे मदले मॅची कडेन फक्त मॅच म्हूण पळयनासतना हें एक तरेचें झूजच अशेच तरेन संवसार पळयता. अंदूंची आशिया करंड क्रिकेट सर्तूय हाका आडवाद थारली ना. ऑपरेशन ‘सिंदूर’ उपरांत पयलेच फावटी हे दोनूय पंगड एकामेका मुखार उबे रावपाचे आशिल्ल्यान ताका वेगळेंच मोडण मेळटलें हें सहाजिकूच आशिल्लें. भारतीय पंगडान हे सर्तींत खेळचें न्हय असोय एक वेगळोच सूर आयकूंक येतालो. पूण पाकिस्तान आशिल्ल्यान माघार घेवन तांकां मुखा वेली चाल दिवप हें तर झुजा बगर हार घेतिल्ले भशेन जातलें आशिल्लें. आशियांत भारतीय पंगडान क्रिकेटीतले आपलें श्रेश्ठत्व खूबशें फावटी निर्विवादपणान सिद्ध केल्ल्यान प्रत्यक्ष मैदानार परतून एकदां बरी कामगिरी करूनच आमीच तुमचे बापूय आसात हें दाखोवन दिवपाकूच चड मजा आशिल्ली आनी आशिया करंड क्रिकेट सर्तींत भारतीय पंगडान नेमकें तेंच काम केलें. आमच्या पंगडा कडल्यान हे सर्तींत ज्यो अपेक्षा आशिल्ल्यो ताची पूर्तताय जाल्ल्याचें समधान देशांतल्या लोकांक आसाच, पूण तेच बराबर पाकिस्तानाचें जें उरलां तें नाकूय कापपाचें काम केल्ल्यान ऐन नवरात्रोत्सवांत चडूच रंगत आयली. विजयादशमी तीन दीस आदींच देशांत मनयली. मैदानाचेरूय ऑपरेशन ‘सिंदूर’ सारकीच कामगिरी केल्ल्याचें प्रधानमंत्री नरेंद्र मोदी हांणी भारतीय पंगडाचें अभिनंदन करतना म्हणलां तें योग्यूच आसा.
दुबयंत खेळिल्ल्या आशिया करंड क्रिकेट सर्तींत पाकिस्ताना कडेन आमी तीन फावटी खेळ्ळे. पूण पाकिस्तानाचें दुर्दैव अशें की ह्या तिनूय मॅचींनी तांकां लजेक घालपी हार घेवची पडली. मुळावे फेरयेंत आनी सुपर फेरयेंत जाल्ली हार पाकिस्तानान तशी व्हडलीशी मनाक लावन घेतली ना ताचें कारण म्हणल्यार फायनलींत भारताक हारोवन करंड जिखत जाल्यार व्हडा अभिमानान आपल्या देशांत परतूं येतालें. पूण फायनलींत लेगीत भारतीय खेळगड्यांनी ‘जिखू वा मरू’ अशीच खर झूज दिवन पाकिस्तानाच्या तोंडांतल्यान जैताचो घांस अक्षरशा काडून घेतलो आनी ताची पुराय तरेन फजेत केली. आंतरराष्ट्रीय क्रिकेटींत भारत ही एक महाशक्ती आशिल्ल्यान तांचे कडल्यान अशा कामगिरीची अपेक्षा सगल्यांकूच आशिल्ली हें खरें आसलें तरी निमाणें मैदानार कितेंय घडूंक शकता हाचीय कल्पना सगल्यांकूच आशिल्ली. तातूंतच पाकिस्ताना सारक्या पंगडा कडल्यान हारप कोणाकूच आवडचें नाशिल्लें. फायनलींत जो जीवघेणो संघर्श दिसून आयलो तो तर हेर खंयचेय मॅचींत सहजतायेन दिसून येवचो नाशिल्लोच. ऑपरेशन ‘सिंदूर’ चे फाटभुंयेर भारतीय पंगडाक जैता बगर कांयच नाका आशिल्लें. जाल्यार संवसारभर जाल्ल्या अपमाना उपरांत भारताक हारोवपाचो आनंद वेगळोच आसपाचो ही पाकिस्तानाची भावना आशिल्ली पूण तशें जालें ना. अणू हल्ल्याची धमकी दिवपी पाकिस्तानाची सगलींच शस्त्रां दुबयच्या मैदानार पोकीं थारलीं आनी ‘सिंदूर’ कारवायेची याद करून दिवपी जैत भारतान मनयत आनीक एक झूज जिखलें आनी पाकिस्तान परतून एकदां सपशेल हारलो.
आशिया करंड क्रिकेट सर्त ज्या वातावरणांत खेळप जालें तें पळयत जाल्यार संवसारीक पांवड्यारूय खेळाचें राजकारण कशें जायत आसा हें लक्षांत येता आनी हें खंय तरी थांबूक जाय अशें दिसूंक लागता. आशिया करंडा सारकी आंतरराष्ट्रीक क्रिकेट सर्त जिखची आनी सर्त जिखपी पंगडा कडेन जैताचो करंड लेगीत येवचो न्हय हातूंतल्यान नेमको संदेश कितें वता हें कळूंक मार्ग ना. आशिया क्रिकेट परिशदेचे अध्यक्ष मोहसीन नक्वी हे पाकिस्तानाचे गृह मंत्री आशिल्ल्यान तांचे कडल्यान करंड स्विकारपा विशीं भारतान घेतिल्ल्या निर्णयाक निश्चीतपणान आदार आसा अशें म्हणूंक येतलें. पूण मोहसीन नक्वी हांणी हाचेर तडजोडीची भुमिका घेवन, खिलाडू वृत्ती दाखोवन हो करंड हेर कोणाचेय हस्तुकीं जैतवंत पंगडान दिल्लो जाल्यार ताका येवकारूच मेळपाचो. पूण खिलाडू वृत्ती अपेक्षीत तरी कोणा कडल्यान करची? तशें कांयच करिनासतना नक्वी आपूण स्वताच हो करंड घेवन गेले आनी तांचो संवसारभर आनीक अपमान जालो. भारतीय क्रिकेट नियामक मंडळ आतां आयसीसी कडेन दाद मागपाचे आसलें तरी आंतरराष्ट्रीय क्रिकेट सर्तींत हे प्रकार कितले मेरेन खपोवन घेवप हाचोय विचार करचोच पडटलो. दुबयंतल्या ऑपरेशन ‘तिलक’ हें पाकिस्तानाक आनिकूय अपमान करपी एक झूजच म्हूण नोंद जातली हातूंत मात दुबाव ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
