भांगरभूंय | प्रतिनिधी
बलुचिस्तान, खबरां संस्था: पाकिस्तानांतल्या बलुचिस्तान प्रांतांत पंजाबांतल्यान आयिल्ले बशींतल्या प्रवाशांक फारपेट करून तांकां मारून उडयल्ल्याची धक्को दिवपी घडणूक उजवाडाक आयल्या. पाकिस्तानांतल्या डॉन दिसाळ्यांत ही खबर आयल्या. ही घडणूक मुसाखेलांतल्या राराशम जिल्ह्यांत घडली. पाकिस्तानाचे प्रधानमंत्री शाहबाझ शरीफ आनी राष्ट्राध्यक्ष आसिफ अली झरदारी हांणी ह्या प्रकाराचो निशेध केला.
राराशम जिल्ह्यांतल्या आंतरप्रांतीय म्हामार्गाचेर ही घडणूक घडली. ह्या मार्गावेल्यान वचपी जायत्या बसींतल्यान प्रवाशांक देंवोवन हल्लेखोर तांचेर हल्ले करतात, अशी म्हायती ह्या प्रांताचे सहाय्यक आयुक्त मुसाखेल नजीब काकर हांणी दिली.
‘‘पाकिस्तानांतल्या पंजाब प्रांतांत वचपी आनी पंजाब प्रांतातल्यान येवपी बसींक हल्लेखोर लक्ष करतात. ह्या बसींची ते तपासणी करतात. उपरांत फकत पंजाब प्रांतांतल्यान येवपी लोकांचेर गुळयो घालतात.’’ अशी म्हायती काकर हांणी दिली. आयज फारपेट केल्ल्या २३ जाणां मदले तीग जाण बलुचिस्तानचेच आशिल्ले. जाल्यार हेर २० जाण पंजाब प्रांतांतल्यान आयिल्ले अशीय म्हायती तांणी दिली.
हल्लेखोरांनी १० ट्रक पेटयले!
मजगतीं उपायुक्त हमीद झहीर हांणी सांगलें : हल्लेखोरांनी हाचे पयलीं १० ट्रक पेटयल्यात. ह्या ट्रकांच्या ड्रायव्हरांकूय तांणी मारून उडयल्यात. पुलीस घडणुके सुवातेर दाखल जाले उपरांत मरण आयिल्ल्यांचो कुडी लागसारच्या हॉस्पिटलांत हालयल्यो.
बलुचिस्तान लिबरेशन आर्मीन घेतली जापसालदारकी
ह्या हल्ल्याची जापसालदारकी बलुचिस्तान लिबरेशन आर्मीन घेतली. मात, आमच्या लोकांनी फकत साद्या भेसांत प्रवास करपी लष्करी अधिकारी आनी सैनिकांक लक्ष्य केलां असो दावो तांणी केला. तांकां गुळयो घालचे पयलीं तांची वळख करून घेतिल्ली अशेंय लिबरेशन आर्मीन सांगलें. मात, पाकिस्तानच्या गृहमंत्र्यांनी हो दावो भायर मारलो. मरण आयिल्ले निरपराधी नागरीक आशिल्ले, अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
