भांगरभूंय | प्रतिनिधी
सुमारा भायर बिलां वाडिल्ल्यान दोगांची आत्महत्या
इस्लामाबाद: पाकिस्तानांत सगली कडेन म्हारगायेचो प्रभाव आशिल्ल्यान लोक सद्या अस्वस्थ आसात. चड करून विजेच्या वाडिल्ल्या मोलाक लागून खूबशा शारांनी लोक रस्त्यार देंवल्यात. गरीब कुटुंबाक हजारांनी रुपयांची बिलां येवंक लागल्यांत. हे खातीर लोकां मदीं तिडकीचें ल्हार पातळ्ळां. मजगतीं, 10 हजारांचे बील पळोवन एकलो गरीब मनीस बेशुद्ध पडलो. ताच्या घरांत एकूच बल्ब आशिल्ल्याचो ह्या कुटुंबाचो दावो आसा.
पाकिस्तानांतल्या फैसलाबादांतल्या एका मनशान 40 हजार पाकिस्तानी रुपयांचें बील फारीक करूंक जमूंक नाशिल्ल्यान मंगळारा आत्महत्या केली. 35 वर्सां पिरायेचो मुहम्मद हमजा हो अर्थीक संकश्टाक सामकार वतालो आनी तो आपलें कुटूंब चलोवपा खातीर खर कश्ट घेतालो. पूण ताका बील भरूंक जमलें ना आनी ताणें स्वताचेर फार मारून घेतलो अशें ताच्या कुटुंबान सांगलें. ताका दोन सान पिरायेचीं भुरगीं आसात.
वाडिल्ल्या विजेच्या बिलां आड निदर्शनां जायत आसतनाच पाकिस्तान पेटलां. विजेचीं बिलां वाडिल्ल्यान सामान्य लोक तिडक उक्तावंक लागल्यात. लोकांनी विरोध म्हणून विजेचीं बिलां लासून उडयलीं, आनी सुटकेचे मागणे खातीर मोर्चे काडले.
सरगोधा पाकिस्तानांत सरगोधा चेंबर ऑफ कॉमर्स अॅण्ड इंडस्ट्री आनी डिस्ट्रिक्ट बार असोसिएशन आनी व्हड संख्येन सामान्य लोक वाडिल्ल्या वीज बिलांच्या निशेधार्थ वांटेकार जाले. बील भरचे नात. वीज तोडपाचो कसलोय यत्न जायत जाल्यार आडायतले अशें आंदोलकांनी सांगलें.
डेरा गाझी खान चेंबर ऑफ कॉमर्स अॅण्ड इंडस्ट्रीचे अधिकारी आनी सामान्य लोकां सयत वेपाऱ्यांनी डेरा गाझी खान हांगा वाडिल्ल्या विजेच्या बिलां आड निदर्शनां केलीं. पाकव्याप्त कश्मीरांतल्या वेपाऱ्यांनी लेगीत वाडिल्ल्या वीज बिलांक विरोध केलो. वीज बील आनी हेर लोकांच्या प्रस्नां आड काल काम बंद केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
