भांगरभूंय | प्रतिनिधी
कराची, खबरां संस्था: पाकिस्तानांतल्या क्वेटा रेल्वे स्टेशनाचेर व्हड स्फोट जाला. ह्या भयानक स्फोटांत आतां मेरेन २० जाणांक मरण आयलां. जायते लोक जखमी जाले. म्हायती प्रमाण मरण आयिल्ल्यांचो आंकडो वाडूंक शकता. सगल्या जखमींक लागसारच्या हॉस्पिटलांत दाखल केल्यात. हे घडणुकेची चवकशी सुरू जाल्या.
मेळिल्ले म्हायती प्रमाण, क्वेटांत दोन बॉम्बस्फोट जाले. स्फोटांत चार जाणांक मरण आयलें. दुसर्या स्फोटांत सुमार १५ जाण जखमी जाले. हो बॉम्ब कोणे घालो? कित्याक हो स्फोट केला? हाचो तपास चालू आसा. सध्या खंयचेच संघटणेन ह्या स्फोटांची जापसालदारकी घेवंक ना. स्फोटाच्या वेळार स्टेशन वाठारांत व्हड गर्दी आशिल्ली. कारण एक प्रवासी गाडी भायर सरपाची आशिल्ली आनी एक प्रवासी गाडी येवपाची आशिल्ली. त्या वेळार बॉम्ब स्फोट जालो.स्फोटा उपरांत क्वेटा रेल्वे स्टेशनाचेर बोवाळ जालो. धांवपळ सुरू जाली.
थंय हाजीर आशिल्ल्या एकल्यान सांगलें, हो व्हड बॉम्ब स्फोट आशिल्लो. म्हायती प्रमाण, जाफर एक्सप्रेस भिंडीच्या दिकेन वताली तेन्ना हो बॉम्बस्फोट जालो.
पाकिस्तानांत बॉम्बस्फोट जावप सदचें जावन पडलां. थंय जायते आतंकवादी गट सक्रीय आसात. देखूनच बॉम्बस्फोट जातात. कांय दिसां आदीं असोच बॉम्बस्फोट जाल्लो. पाकिस्तानांतल्या अशांत उत्तर वझीरिस्तानांत बॉम्बस्फोटांत चार सुरक्षा रक्षकांक मरण आयिल्लें. जायते जाण जखमी जाले. ते भायर खैबर पख्तूनख्वात एके शाळे लागसारा बॉम्बस्फोट जालो. ह्या स्फोटांत दोन भुरग्यांक मरण आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
