भांगरभूंय | प्रतिनिधी
काबूल: पाकिस्तानान सोमारा रातीं अफगाणिस्तानाचेर आनीक एक हवाई हल्लो केलो. पाकिस्तानाच्या वायुसेनेच्या झुजारी विमानांनी राजधानी काबूलांतल्या जायत्या वाठारांक लक्ष्य केलें, हातूंत एका हॉस्पिटलाचोय आस्पाव आसा. रॉयटर्स खबरां एजन्सीच्या म्हणण्या प्रमाण ४०० जाणांक मरण आयलां आनी २५० परस चड जखमी जाल्यात.
वृत्ता प्रमाण, दारुलअमान, अरजान किंमत, खैरखाना आनी काबुल आंतरराष्ट्रीय विमानतळाच्या लागीं लागीं खुबश्या सुवातांचेर स्फोट आनी फारपेटीचे आवाज आयकुपाक आयले. तालिबान सरकाराचे प्रवक्ते जबीहुल्लाह मुजाहिद हांणीे आरोप केला, पाकिस्तानी सैन्यान काबुलच्या एका व्यसनमुक्त हॉस्पिटलाचेर बॉम्ब उडयले.
तालिबानान ह्या हल्ल्याचो खर निशेध करीत हाका मानवते आडचो गुन्यांव म्हणलां आनी पाकिस्तानान अफगाणिस्तानाच्या हवाई हद्द मोडिल्ल्याचें म्हणलां.
जाल्यार, पाकिस्तानाचे प्रधानमंत्री शहबाज शरीफ हांचे प्रवक्ते मोशर्रफ जैदी हांणी हे आरोप निराधार आशिल्ल्याचें म्हणलें आनी काबुलच्या खंयच्याच हॉस्पिटलाक लक्ष्य करूंक नाशिल्ल्याचें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
