पाका आड जैताची हॅट्रीक करपाक भारत सज्ज

भांगरभूंय | प्रतिनिधी

भारत आनी पाकिस्तान ह्या पंगडां मदीं आयज आशिया करंड क्रिकेट सर्तीची फायनल जातली. सर्त 1984त सुरू जाल्ली. अंदूंचो 17वें संस्करण, पूण पयले खेपे भारत आनी पाकिस्तान ह्या पंगडां मदीं फायनल जाता. भारतान आठ खेपे ही सर्त जिखल्या. जाल्यार पाकिस्तानान दोन खेपे करंडाचेर नांव कोंत्रायलां.
दुबय इंटरनॅशनल क्रिकेट स्टेडियमाचेर साबार खेळपट्ट्यो आसात. भारत आनी श्रीलंका ह्या पंगडां मदीं सुपर चारांतली जी मॅच जाल्ली, ते खेळपट्टीचेर धांवड्यांचो पावस पडटा. जाल्यार स्टेडियमांत कांय अशो लेगीत खेळपट्ट्यो आसात जंय स्पिनरांक मजत जाता. तशेंच बॉल थांबून येता. अशेच खेळपट्टीचेर फायनल जाली अशी आस्त आसा. अशे खेळपट्टीचेर मॅच जाली जाल्यार ताचो फायदो बॉलरांक जातलो आनी बॅट्समनांक धांवड्यो करपाक संघर्श करचो पडटलो.
टॉस जिखपी पंगड पयलीं बॉलींग घेवपाची शक्यताय चड आसा. दुसरो डाव सुरू जाता त्या वेळार दंव पडटा आनी ताचो फायदो उपरांत बॅटींग करपी पंगडाक जावपाची शक्यताय आसा. पयलीं बॅटींग करपी पंगडाक जैत जोडपाक किमान 171 धांवड्यो करपाची गरज आसा.
भारतान सर्तींत अजून मेरेन एकूय हार घेवंक ना. ताणें सेगीत स मॅची जिखल्यात. हातूंतली फकत श्रीलंके आडची मॅच कठीण गेल्या. सर्तींत पाकिस्तानाक दोन खेपे हारायला. पयलीं गट पांवड्याचेर आनी दुसरे खेपे सुपर चारांत.
दुसरे वटेन पाकिस्तानाच्या प्रदर्शनांत सातत्य दिसूंक ना. भारताक सोडलो जाल्यार हेर खंयच्याच पंगडाक ताका हारोवपाक शक्य जावंक ना. दरेक मॅचींत पाकिस्तान कठीण स्थितींत दिसतालो पूण, अखेरेक जैत जोडपाक येसस्वी थारला.
संभाव्य पंगडः
भारत: सूर्यकुमार यादव (मुखेली), शुभमन गिल (उप मुखेली), अभिषेक शर्मा, तिलक वर्मा, हार्दिक पंड्या, शिवम दुबे, अक्षर पटेल, जितेश शर्मा, जसप्रीत बुमरा, अर्शदीप सिंह, वरुण चक्रवर्ती, कुलदीप यादव, संजू सॅमसन, हर्षित राणा आनी रिंकू सिंह.
पाकिस्तान: सलमान अली आगा (मुखेली), अबरार अहमद, फहीम अशरफ, फखर जमां, हारिस राऊफ, हसन अली, हसन नवाज, हुसैन तलत, खुशदिल शाह, मोहम्मद हारिस, मोहम्मद नवाज, मोहम्मद वसीम जूनियर, साहिबजादा फरहान, सईम अयूब, सलमान मिर्जा, शाहीन अफरीदी आनी सुफयान मोकिम.