भांगरभूंय | प्रतिनिधी
ल्हान आसतना जे पांयवाटेन हांव आमच्या घरा यो-वच करतालों, ती वाट माडोवपाची इत्सा आयज म्हज्या मनाक सतवंक लागिल्ली. सांजवेळार पांयांत रबरी व्हाणो चडयल्यो आनी न्हंय जशी व्हड उमळशिकेन दर्याक मेळपाक वता, तसोच हांव त्या आमच्या भुरगेपणांतल्या पांयवाटेक मेळपाक, त्या वाटे वेल्यान चलत रावलों.
पांयवाटेन चलतना त्यो आदल्यो यादी खडबडून जाग्यो जाल्यो…. पांयवाट माडयतना, त्यो भांगराळ्यो यादी आडखळ्ळ्यो…. हीच ती पांयवाट जाचेर यो-वच करून म्हजे भुरगेपण गेलें.आजय ती पांयवाट म्हजी व्हड उमळशिकेन वाट पळयताली. म्हज्या घरा कडेन वचपी पांयवाट, आयज परत आदल्या म्होंवाळ यादींनी चींब भिजली….पांयवाटेर चलतना, जेन्ना जेन्ना तोल (Balance) वता सो दिसतालो, त्या त्या वेळार ह्याच पांयवाटेन म्हाका सांबाळून घेतिल्ल्या खिणांची याद आयज म्हाका जाली ..!
सुटये दिसांनी, चवथ, दिवाळेक, जात्रा, काल्याक, शारांतल्यान गांवांत आयलो की ह्याच पांयवाटे वेल्यान अजुनूय हांव म्हज्या मुळाव्या घरा वता…. आनी घरा वतना, एका पिश्या वरीं ते वाटे कडेन उलयत आसता..! हांगाच म्हज्या विचारांचे दिवप-घेवप जाता..! हीच ती वाट, ज्या वाटे वेल्यान चलतना हांवें म्हज्या जिणेची पयली अ आ इ ई गिरयिल्ली.
तेच गांव, तीच माती, तेच घर आनी तीच पांयवाट जी मुळाव्या रस्त्या वेल्यान म्हाका म्हज्या घरा घेवन वता. ह्याच पांयवाटेर ल्हान आसतना हांव खेळ्ळों, अापटलों आनी धोपटलों. ह्याच पांयवाटेन सूख दुख्खांत म्हाका वांगोड दिलो. ह्याच पांयवाटे वेल्यान चलतना, आडखळत धडपडत ल्हानाचो व्हड केलो. हीच ती पांयवाट जी,अजुनूय म्हाका आयजय फुडलो मार्ग दाखयता..! दर्यादेगेर, एक उचार आशिल्लो दिपस्तंभ (Light House) दर्यांत भरकटिल्ल्या , शेणिल्ल्या बोटींक, व्हड्यांक वाट दाखयता, तशेंच ही वाट म्हाका काळखा कडल्यान उजवडा कडेन वचपाचो मार्ग दाखयता.
सुटी पडटकूच, पाचवेचार सैमान शिरिंगारिल्ल्या गांवांत पावतकूच मनांत असो विचार येता, की ह्या शारांनी अशें दवरलां तरी किदें?? खरें म्हळ्यार गांवांत, मनशांत मनीसपणा ही गजाल उपाट भरिल्ली आसता… मनशा मनशां मदीं सुसंवाद आसता. एकामेकांचो मोग आसता… एकामेकांचो आदर आसता.
आयज हीच पांयवाट आशेल्या ती फक्त म्हज्या आनी तुमच्या पांयांच्या स्पर्शाक. आनी हांव आशेलां तो त्या पांयवाटेर, म्हजी वाट पळयत अाशिल्ल्या मातयेच्या स्पर्शा खातीर !…. तेच मातयेक उटंगाराचो पावस पडून गेले उपरांत, येवपी धुंद वासा खातीर हांव आशेलां!
पूण सांकवा पोंदच्यान खूब उदक आयज मेरेन व्हांवून गेलां. त्या पांयवाटेर उरल्यात त्यो, आतां फक्त म्हज्या… तुमच्या पावलांच्यो खुणाे…!
पांयवाट अशी आसपाक जाय, जी आडखळीची, आडमेळीची काय जायना, पूण सरळ तुमकां तुमच्या ध्येया कडेन घेवन वता, यशाच्यो गुढयो उबारपाक हात-बोट लायता, यशाचे तेंगशेर व्हरून सोडटा.
अशें दिसता की पाचव्याचार सैमांतल्यान वाट काडीत, सर्गात वचपी ही तांबड्या मातयेची पांयवाट सगल्या वाठांरानी आसची….. लोकांक सोबीत आनी सुंदर असो मार्ग दाखयत फुडे वचत रावची… आपले सुंदरतायेन, वाटेन चलप्यांची मनां खुशालकायेन भरून वचची….. सरभोंवतण खुशालकायेन फुलुन वचची…
चडश्या तरणाट्यांक ह्याच पांयवाटेन आपल्या मोग्याक चोरयांनी मेळपाक, मोलादीक वांगोड केल्लो… सांगात दिल्लो. आमच्या फुलिल्ल्या, परमळिल्ल्या जुवानपणाच्या मोगाक, हीच पांयवाट गवाय आशिल्ली.
त्या म्होंवाळ खिणांची, सांजवेळच्या वेळार याद येत जाल्यार, एका खोल गेल्ल्या घाव्याची खपली काडिल्ले वरी दिसता…. काळजाक जाल्ल्या घाव्यांतल्यान, कळत-नकळत दुख्खाचे रगत व्हांविल्ले भशेन दिसता आनी मन एका खोल दरयेंत शेणिल्ले वरी जाता !
एकनाथ सामंत
9226219723
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
