भांगरभूंय | प्रतिनिधी
तरणाट्या पुंडलिकाक गंगा, यमुना, आदी पवित्र न्हंयांक तांच्या मनीसरुपांत पळोवपाची संद मेळटा. तेन्ना तीं ताका जिणेंतल्या कर्तव्यांचो उगडास करून बरें मार्गदर्शन दितात.
रंगमाचये वयलो एक आगळो वेगळो शो म्हणून जीएसएसएस महिला विभाग, पल्लुरुथी हांणी ‘पांडुरंग महिमा’ नांवाचो ‘कोंकणी दृश्याविश्कार’ हालींच कोची- पल्लुरुथीच्या डी. डी. कलामंदिरांत सादर केलो. मुळांत हें एक भक्ती विशयाचें नृत्य नाटक. फरक म्हणल्यार माचयेचे फाटले वटेन उबी केल्ली 10 x 8 फूट एलईडी वणत. पूण हो जालो खरोच अजापाचो फरक! कार्यावळीच्या सुरवाती सावन निमाणे मेरेन ही एलईडी वणत जिवाळ आशिल्ली आनी ताचे निमित्तीं दरेक दृश्य जितें जिवें आनी तेजिश्ट जालें. संवाद स्फटिकी स्पश्ट आशिल्लो. कारण, तो पयलींच साउंड स्टुडिओंत डब केल्लो आनी पार्श्वसंगीता वांगडा प्री- रेकॉर्ड केल्लो. पार्श्वसंगीता वांगडा सैमीक आवाजांचोय आस्पाव जाल्लो. ह्या दोनांचो एकत्रीत परिणाम म्हणल्यार एक अजापाचो, सिनेमा सारको अणभव. एका ऋषीच्या आश्रमाच्या रंगांत झाडार बसून खोशीन गावपी नीज सवणें आमकां ते एलईडी वण्टीचेर पळोवपाक मेळ्ळें! ताच्या सांगातांत त्या सवण्याचीं गोड चिरपणांय आमकां स्पश्टपणान आयकूंक येतालीं! अशे तरेन आशिल्लो हो दृश्याविश्कार!
नाटकाच्या पयल्या रंगांत एक हरिकथा कलाकार दिसता आनी तो पांडुरंगाली महिमा गायन करता. महाकवी लीलाशुकाल्या ‘श्रीकृष्ण कर्णामृत’नांवाच्या संस्कृत काव्यांतल्यान एक विख्यात श्लोक उद्धृत करून ताचो अर्थ सांगता. पांडुरंगाल्या भक्तांच्या जिवितांतल्या अप्रूप घडितांतल्यानूच भगवंताची महिमा स्पश्ट जाता अशी तो सांगता आनी तीं घडितां पळोवपाक सगळ्यांक येवकार दिता.
दुसऱ्या आनी तिसऱ्या रंगांनी पुंडलिकाली काणी मेळटा. तरणाट्या पुंडलिकाक गंगा, यमुना, आदी पवित्र न्हंयांक तांच्या मनीसरुपांत पळोवपाची संद मेळटा. तेन्ना तीं ताका जिणेंतल्या कर्तव्यांचो उगडास करून बरें मार्गदर्शन दितात. उपरांत तो आपलीं कर्तव्यां पाळून जिवीत जगता आनी आपल्या जाण्ट्या आवय-बापायची भक्तीन जतनाय घेता. भगवान श्रीकृष्ण ताका आशीर्वाद दिवपाक ताच्या घरा वता तेन्ना आपणाक आवय- बापाय कडलीं कर्तव्यां पुराय करपाचीं आसा म्हूण पुंडलीक भगवंताक सांगता. देवाक उबो रावपा खातीर एक विट अर्पण करता आनी कृपा करून वाट पळोवपाची विनंती करता. भगवंत हें मान्य करता आनी विटेचेर उबो रावता.
चवथ्या रंगांत संत नमदेवाच्या भुरगेपणांतली एक अद्भुत घडणूक दाखयल्या. एक दीस भुरगो नामाक ताचो बापूय व्यापारा संबंदी भोंवडेंतल्यान परत येवंक नाशिल्ल्यान बापाय बदला देवळांत धाडटात. नामा पांडुरंगाक निवेद अर्पण करता आनी भगवंतान तो स्विकार करूंक ना म्हूण निराश जाता. निवेद स्विकारूंक तो भगवंताक परतून परतून आग्रो करता. निमाणें भगवान पांडुरंग ताचे मुखार प्रकट जावन निवेद स्विकारता.
संत जनबाईच्या जिवितांतली पयली घडणूक म्हणल्यार ती भुरगेपणांत आवय- बापाय वांगडा पंढरपूराक आयिल्ली आनी तिणें देवूळ सोडपाक न्हयकार केल्लो. उपरांत संत नामदेव तिका आपल्या घरा व्हरता. संत जनबाईच्या जिवितांतलीं आनीक दोन घडितां तशेंच संत सखूबाईच्या जिवितांतली एक घडणूक हींय बी माचयेर सादर जालीं.
निमाण्या रंगांत सगळ्या सहभागी कलाकारांनी हॉलाच्या फाटल्यान सावन रंगवेदी मेरेन भव्य मिरवणूक काडली आनी वेदीचेर भक्तिपूर्ण गट भजनाची कार्यावळ जाली. पुराय नाटकाचो व्हिडियो यूट्युबाचेर अपलोड केला. मुजरत पळोवचो. https://youtu.be/9bwspsL2XpM?si=XsBRlSMNx97djGv4
9495093380
– शरतचंद्र शणै
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
