भांगरभूंय | प्रतिनिधी
मुख्यमंत्रीः एजींच्या सल्ल्यान प्रक्रिया बेगोबेग पुराय करात
भांगरभूंय I प्रतिनिधी
पणजी : पांच हेक्टर परस उण्या ब्लॉकांत परंपरीक पद्दतीन रेंव काडपाक भौशीक सुनावणी जावपा पयलीं परवानगी दिवपाचो अधिकार खण खात्याक आसा. ते भायर मामलेदार लेगीत अशा प्रकारान रेंव काडपाक परवानगी दिवपाक शकतात, असो सल्लो अॅडव्होकेट जनरल (एजी) देविदास पांगम हांणी हालींच घेतिल्ले बसकेंत दिला. ह्या सल्ल्या प्रमाण खण खात्यान परंपरीक रेंव काडपाची प्रक्रिया बेगिनांत बेगीन पुराय करची, अशें निर्देश मुख्यमंत्री डॉ. प्रमोद सावंत हांणी दिल्यात.
राज्यांत परंपरीक पद्दतीन रेंव काडपाक परतून परवानगी दिवपा विशीं मुख्यमंत्री डॉ. सावंत हांणी हालींच अॅडव्होकेट पांगम, मुख्य सचीव पुनीतकुमार गोयल, मुख्यमंत्र्यांचे सचीव, दोनूय जिल्ह्यांतले जिल्होधिकारी, पुलीस अधिक्षक, खण, पर्यावरण, येरादारी, महसूल खात्यांचे संचालक, खण उपसंचालक, सगले उपजिल्होधिकारी आनी पुलीस उपअधिक्षकांची म्हत्वाची बसका घेतली. पयलीं परंपरीक पद्दतीन रेंव काडपाक प्राधान्य दिवन अॅडव्होकेट जनरलांच्या सल्ल्यान अशे पद्दतीन रेंव काडपाक परवानो दिवपाचो निर्णय मुख्यमंत्र्यान हे बसकेंत घेतला.
सध्या फक्त शापोरा न्हंयेंतल्यान रेंव काडपाक पर्यावरणीय दाखले दिल्ल्याची म्हायती पर्यावरण संचालकांनी बसकेंत दिली. ताचेर पर्यावरणीय दाखले मेळ्ळे तरी खण खात्याची परवानगी मेळूंक ना, अशी म्हायती उत्तर गोंय जिल्होधिकाऱ्यांनी
दिली. ताचेर पांच हेक्टरा वयल्या ब्लॉकांत रेंव काडपाक कायद्या प्रमाण भौशीक सुनावणेची गरज आसा. हे विशीं राष्ट्रीय हरीत लवादांत (एनजीटी) याचिका दाखल केल्ल्याचे खण उपसंचालकांनी सांगलें. ताचेर हे याचिकेक ‘एनजीटी’न स्थगिती दिवंक नाशिल्ल्यान खण खातें परंपरीक पद्दतीन रेंव काडपाक आडावंक शकना. शापोरा सयत हेर चार न्हंयांतल्या पांच हेक्टर परस उण्या ब्लॉकांत परंपरीक पद्दतीन रेंव काडपाक खण खात्याक मान्यताय दिवपाक मेळटा, अशें अॅडव्होकेट जनरल पांगम हांणी सांगलें.
मजगतीं, हेर राज्यांतल्यान गोंयांत येवपी रेंवे खातीर कितलें शुल्क आकारतात हाची म्हायती खण खात्यान बेगोबेग मेळोवची, अशें निर्देश मुख्यमंत्र्यान खण खात्याक दिल्यात. जाल्यार बेकायदो रेंव काडप्यांक प्रोत्साहन दिवपी तशें अशा कृत्यां वरवीं राज्याचो महसूल बुडोवपी प्रशासना वरवीं नियंत्रण दवरपाची सुचोवणी तांणी मुख्य सचिवांक केल्या. हे विशीं बेगिनूच सगल्या अधिकाऱ्यांची बसका घेवन रेंव काडपा विशीं धोरण निश्चीत करपाची हमी मुख्य सचिवांनी मुख्यमंत्र्यांक दिल्या.
हेर चार न्हंयांचो अहवाल बेगोबेग घेवचो
राज्यांत सध्या फक्त शापोरा न्हंयेंतल्यान परंपरीक पद्दतीन रेंव काडपाक परवानो दिला. हेर चार न्हंया विशीं समुद्र विज्ञान संस्थेचो (एनआयओ) अभ्यास सुरू आसा, अशी म्हायती पर्यावरण संचालकांनी बसकेंत दिली. ताचेर मुख्यमंत्र्यान खण खात्यान एनआयओक सहकार्य करून हेर चार न्हंयांचो अभ्यास अहवाल पर्यावरण खात्या कडेन दिवचो आनी थंयच्यान परंपरीक पद्दतीन रेंव काडपाक परवाने दिवचे, अशें निर्देश दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
