भांगरभूंय | प्रतिनिधी
भांगरभूंय । प्रतिनिधी
पणजीः आपल्या पांच वर्सा पिरायेच्या चल्याचो खून केल्ल्या प्रकरणात पणजी पुलिसांनी ताळगांवांत रावपी मूळ नेपाळचे सुनिता राणी दांगी (25) हे आवयक अटक केली. सुनिता राणी हिच्या भाड्याचे कुडींत फाटल्या शेनवारा हो चलो बेशुद्ध अवस्थेंत मेळल्लो. ताका बांबोळे जीएमसीत दाखल केल्लो. उपचार सुरू आसतना ताका मरण आयलें. आयतारा ताचे कुडीचेर केल्ले पोस्टमॉर्टेमात गळो अंदिल्ल्यान ताका मरण आयिल्ल्याचें स्पश्ट जालें. उपरांत पणजी पुलीस स्टेशनातली बायल उपनिरीक्षक संपना गांवस हिणे खूनाची कागाळ नोंद केली.
पुलीस निरीक्षक निखिल पालयेकारान उपरांत सुनिता राणीक ताब्यांत घेवन चवकशी केली तेन्ना तिणे खून केल्ल्याची कबुली दिली. तिचे आड गोंय बाल कायद्याच्या कलम 8 तशेंच आयपीसीच्या कलम 302 खाला गुन्यांव नोंद करून तिका अटक केली. सुनिता राणी घरकाम करून आपलें पोट भरताली तशेंच ती घोवा वांगडा रावनाशिल्ली अशी म्हायती थळाव्या लोकांनी पुलिसांक दिली.
सोमाराक पणजेच्या पयलो वर्ग न्यायालयान सुनिता दांगीक रिमांडा खातीर उबी केली तेन्ना न्यायाधिशान तिका 11 दिसांची पुलीस कायद दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
