भांगरभूंय | प्रतिनिधी
पणजीः येता त्या पांच वर्सां भितर कदंब म्हामंडळाच्यो 300 बशी कावलाक काडपाच्यो आसात. तातूंतल्यो 71 टक्के बशी ह्यो वर्स 2028त कावलाक येतल्यो. मजगतीं, कंदब येरादारी म्हामंडळान फाटल्या तीन वर्सांत 138 नव्यो बशी विकत्यो घेतल्यात. तातूंतल्यो 34 टक्के ह्यो ईव्ही बशी आसात, अशी लेखी म्हायती येरादारी मंत्री माॅवीन गुदिन्हो हांणी दिली.
मयेंचे आमदार प्रेमेन्द्र शेट हांणी विधानसभेच्या पटलार विचारिल्ल्या प्रस्नाक येरादारी मंत्री माॅवीन गुदिन्हो हांणी लेखी जाप दिली.
गोंयांत 605 बशी सद्या कार्यरत आसात. तातूंतल्यो 47 ह्यो ईव्ही बशी, 120 फेम सबसिडी खाला आयिल्ल्यो ईव्ही बशी आनी 438 ह्यो डिझल बशी आसात आनी ह्या डिझल बशी मदल्या 302 बशींक 15 वर्सां मायज जाल्ल्या कारणान 2030 मेरेन पांवड्या पांवड्यार त्यो कावलाक काडटले.
वर्स 2011त घेतिल्ल्यो 18 बशी अंदू 2026त कावलाक येतल्यो, 2012त घेतिल्ल्यो 17 बशी 2027सात कावलाक येतल्यो, 2013त घेतिल्ल्यो 215 बशी 2028त कावलाक येतल्यो, 2014त घेतिल्ल्यो 20 बशी 2029त कावलाक येतल्यो आनी 2015त घेतिल्यो 32 बशी 2030त कावलाक काडटले.
जानेवारी 2023 ते डिसेंबर 2025 मजगतीं, कदंबान 138 नव्यो बशी विकत्यो घेतल्यात आनी तातूंतल्यो 48 ह्यो ईव्ही बशींचो आस्पाव आसा. वर्स 2023त 38 पीएमआय ईव्ही बशी घेतिल्ल्यो. 2024त 37 बशी घेतिल्ल्यो आनी तातूंतल्यो 10 ईव्ही आसात आनी उरिल्ल्यो डिझल आसात. वर्स 2025त 63 नव्यो डिझल बशी विकत्यो घेतिल्ल्यो.
फेम 2 हे येवजणे खाला कदंब येरादारी म्हामंडळान कंत्राटी पद्दतीचेर 12 मिटराच्याे 50 ईव्ही बशी आनी 9 मिटराच्यो 73 बशी घेतल्यात. जाल्यार कोंडूसकर ट्रेव्हल्स हांचे कडल्यान 4 व्हॉल्वो बशी घेवन कदंबा स्वता चलयता. ह्यो चारय बशी 2030त कावलाक येवपाच्यो आसात अशी म्हायती मॉवीन गुदिन्हो हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
