भांगरभूंय | प्रतिनिधी
-परिशदेक लागून गुंतवणूक, उद्देजक निर्मितीक मेळटा उर्बा : मुख्यमंत्रीपणजी : पांच वर्सां उपरांत अंदूं 8 नोव्हेंबर ते 10 नोव्हेंबर मेरेन गोंयांत गुंतवणुकी संबंदी अमेझींग गोवा ही संवसारीक पांवड्यावेली परिशद जाता. पांच वर्सां पयलीं 2019 त व्हायब्रंट गोवा ही संवसारीक पांवड्यावेली परिशद जाल्ली. अशें प्रकारच्या परिशदेक लागून गुंतवणुकी सयत नवे उद्देजक तयार जावपाक उर्बा मेळटा, अशें मुख्यमंत्री डॉ. प्रमोद सावंत हांणी सांगलें.
गोंय सरकार आनी व्हायब्रंट गोवा फावंडेशन मदीं समजिकायेची कबलांत (एमओयू) जाली. हाचे उपरांत उलयतना मुख्यमंत्री डॉ. प्रमोद सावंत हांणी ही म्हायती दिली. ह्या वेळार उद्देग मंत्री मॉवीन गुदिन्हो, आदले केंद्रीय मंत्री सुरेश प्रभू, व्हायब्रंट गोवा फावंडेशनाचे कार्यकारी अध्यक्ष राजकुमार कामत तशेंच हेर अधिकारी हाजीर आशिल्ले. ताळगांवच्या डॉ. श्यामाप्रसाद मुखर्जी स्टेडियमाचेर 8 ते 10 नोव्हेंबर मजगतीं परिशद जातली. आतां मेरेन 46 देशांतल्या 260 प्रतिनिधींची नोंदणी जाल्या. हे परिशदे खातीर सरकार कसलोच खर्च करिना. प्रायोजक आशिल्ल्यो कंपन्यो कार्यावळीचो खर्च करता. देश-विदेशांतले उद्देजक, गुंतवणूकदार आनी सरकार हांचें मदीं संबंद तयार जावपाक परिशद उपेगी थारता. हाचे पयलीं 2019 त जाल्ले व्हायब्रंट गोवा परिशदेचो गोंयच्या उद्देजकांक लाव जाल्लो, अशें मुख्यमंत्री डॉ. प्रमोद सावंत हांणी सांगलें.
गोंय चेंबर, जीएसआयए, असोचेम ह्याे संघटणा परिशदेंत वांटो घेतले. उद्देगीक प्रदर्शनां, चर्चासत्रां तशेंच तरेकवार विशयांचेर भाशणां परिशदेत जातलीं.
गोंयच्या सामाजीक आनी अर्थीक उदरगतीक उर्बा दिवपी उद्देग सुरू जावपाक जाय. उदरगतीचो लाव लोकां मेरेन कसो पावतलो, अशें तरेन नियोजन जावपाक जाय, अशें आदले केंद्रीय मंत्री सुरेश प्रभू हांणी सांगलें.
हाचे पयलीं 2019 त व्हाब्रंट गोवा परिशद जाल्ली. हे परिशदे उपरांत राज्यांतल्या 33 एमएसएमई हांणी निर्गत सुरू केली, अशी म्हायती राजकुमार कामत हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
