भांगरभूंय | प्रतिनिधी
पणजीः पूर्व मुळावे ते मुळाव्या विद्यार्थ्यां खातीर सुरू केल्ल्या मदले सुटयेंतल्या खाणाचेर सरकारान फाटल्या पांच वर्सां 120 कोटी रुपया खर्च केल्यात. सरकारान जारी केल्ल्या एका अहवालाचे आंकडेवारींतल्यान ही म्हायती मेळ्ळ्या. विद्यार्थ्यांक बरो पुश्टीक आहार मेळचो हे खातीर ही येवजण सुरू केल्या.
राज्यांतल्या स्वयंसहाय गट, महिला मंडळ, पालक शिक्षक संघटणा अशा वट्ट 118 गटांक विद्यार्थ्यांक मदले सुटयेंतले खाण दिवपाचें कंत्राट दिलां. आदीं पूर्व मुळाव्या दर विद्यार्थ्या खातीर 6.11 रुपया दिताले. जाल्यार मुळाव्या विद्यार्थ्या खातीर 7.45 रुपया दिताले. हो दर परवडना हे खातीर मदले सुटयेंतल्या खाणाची पुरवण करपी गटांनी दर वाडोवन दिवपाची मागणी केली. ते उपरांत नोव्हेंबर 2022 त पूर्व मुळाव्या दर विद्यार्थ्याक 8 रुपया आनी मुळाव्या विद्यार्थ्याक 10 रुपया दिले. हे येवजणे खातीर 60 टक्के निधी केंद्र सरकाराचो आसा. जाल्यार 40 टक्के निधी राज्य सरकाराच आसा. भुरग्यांक पुलाव, चपाती, फोव, खिचडी अशे तरेचें मदले सुटयेंतलें खाण दितात. सरकारी मुळाव्या शाळांनी शिकपी विद्यार्थ्यांक शाळेंत आसतना पुश्टीक आहार मेळचो ह्या उद्देशान ही येवजण सुरू केल्या. पूण सध्या दर परवडनाशिल्ल्यान मदले सुटयेंतल्या खाणाची पुरवण करपी गट बऱ्या दर्जाचो पुश्टीक आहार विद्यार्थ्यांक दिवपाक शकनात.
वर्स ——————- खर्च (लाखांत) ———————– लाबार्थी विद्यार्थी
2018-19—- – ———— 2568.98————————– 1,61,693
2019- 20—————– 2444.72—————————–1,61,495
2020- 21—————–1665.39 —————————- 1,59,037
2021- 22 —————–2459.51—————————–1,59,037
2022- 23—————- -2865.46—————————–1,63,123
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
