पांच राज्यांचो कौल… लोकसभेची रंगीत येसाय

भांगरभूंय | प्रतिनिधी

मतदारांच्या मनांत कौल कोणा वटेन आसा हें मतपेटयांतल्यानूच दिसून येतलें. ह्या पांच राज्यांतल्या येसाचेरूच लोकसभेची वेंचणूक केन्ना जातली हाचो अदमास येतलो.

मु खेल वेंचणूक आयुक्त राजीव कुमार हांणी हालींच देशांतल्या
पांच राज्यांनी जावपी विधानसभेच्यो वेंचणुको जाहीर केल्यात.
ते प्रमाण ह्या सगल्या राज्यांनी 5 नोव्हेंबर ते 30 नोव्हेंबर मेरेन मतदान जातलें, आनी 3 डिसेंबराक निकाल जाहीर जातलो. उपरांत कांय दिसांतूच लोकसभेची वेंचणूक जाहीर जातली. ही वेंचणूक घडये रोखडीच जाहीर जावपाची शक्यताय आसा. आयचे घडयेक ह्या पांच राज्यां मदीं मध्य प्रदेश ह्या एकाच राज्यांत भाजपाची सत्ता आसा. राजस्थानांत काँग्रेस सत्तेर आसा. जाल्यार तेलंगणांत बीआरएस चे चंद्रशेखर राव सत्तेर आसात. छत्तीसगडांत काँग्रेस सत्तेर आसा. जाल्यार मिझोरामांत एमएनएफ चे झोरमथांगा हे मुख्यमंत्री आसात. ह्या दरेक राज्याची स्थिती आनी वेंचणूक निकालाचे अदमास कितें सांगतात हें समजून घेवया.

1. मध्य प्रदेश
   तशें पळोवंक गेल्यार ह्या राज्यांत भाजपान कितलींशींच वर्सा सत्ता भोगल्या. सद्या थंय शिवराज सिंह चौहान मुख्यमंत्री आसात. ह्या राज्यांत 230 सुवातां खातीर लडत जातली. हें राज्य भाजपाचे नदरेन सामकें म्हत्वाचें. हांगा प्रस्थापीत राज्य सरकारा आड खूबशे कडेन असंतोष आसा. बेरोजगारीचो मुद्दो जाल्यार सामको गाजता. शेतकारांच्यो लेगीत खूबशो समस्या आसात. शिक्षणा संबंदी लेगीत खूबशो समस्या आसात. वाडटे गुन्यांव आनी बायलां विरोधी घडणुको हे मुद्दे प्रचारांत म्हत्वाचे आसतले. खूबशे दीस चौहान हांचें नांव विधानसभे खातीर जाहीर जावंक नाशिल्लें. पूण पयर जाहीर केल्ले वळेरेंत तांचें नांव आसा. पूण अजून लेगीत भाजपा वतीन मुख्यमंत्री कोण हें नांव मात अजून निश्चीत जावंक ना. हांगा सी व्होटर ज्या अदमासा प्रमाण अटीतटीची लडत जातली. काँग्रेस सर्वसादारण 110 ते 125 सुवातो मेळयतली जाल्यार भाजपा 103 ते 116 सुवातो मेळयतली असो अदमास आसा. हाचोच अर्थ लडाय नेक टू नेक आसा. घडये भाजपा थोड्या भोव मतांनी मुखार वचत अशें दिसता. लोकसभेच्या सुवातांचे नदरेन लेगीत मध्य प्रदेश भाजपाचे नदरेन सामकें म्हत्वाचें आसा.
2. राजस्थान
   ह्या राज्यांत सद्या काँग्रेस पक्ष सत्तेर आसा. आदले उपमुख्यमंत्री सचीन पायलट आनी मुख्यमंत्री अशोक गेहलोत हांचे मदले मतभेद काँग्रेस पक्षाक तकलीफोड थारल्यात. गेहलोत सरकारान खूबशो येवजण्यो जाहीर केल्यात. तातूंत पोरणी पेन्शन येवजण, तशेंच 500 रुपयांत गॅस सिलिंडर ह्यो येवजण्यो म्हत्वाच्यो आसात. हांगा कायदो आनी सुवेवस्था तशेंच शेतां खातीर घेतिल्लें रीण माफ करपाचें आस्वासन पुरायपणान अपेशी थारलां. हे मुद्दे प्रचारांत आसतले. काँग्रेस पक्षाचे नदरेन हांगासरली सत्ता ही सामकी म्हत्वाची आसा. हांगासरले लोक सदांच सत्ताधारी पक्षा आड मतदान करतात असो आयज मेरेनचो अणभव. 1993 उपरांत हांगा सेगीत दुसरे फावटी पक्ष सत्तेंत आयिल्लो ना. हांगाय सी व्होटर आनी कांय टीव्ही चॅनलाच्या अदमासा प्रमाण भाजपा 200 विधानसभेच्या सुवातां मदल्यो 125 ते 137 सुवातो मेळयतली. जाल्यार काँग्रेस पक्ष 59 ते 69 सुवातो मेळयतलो अशें चित्र दिसून येता. हाचोच अर्थ हांगा भाजपा सत्तेर येवपाची चड संद आसा. हांगा लेगीत आदल्यो मुख्यमंत्री वसुंधराराजे शिंदे हांकां अजून मेरेन तिकेट दिवंक ना. इतलेंच न्हय जाल्यार भाजपान तांचे कडेन आडनदरूच केल्ल्याचें दिसून येता. हाचोच अर्थ हे वेंचणुकेंत राजस्थानांत कितलो परिणाम जातलो हें रोखडेंच दिसून येतलें.
3. तेलंगणा
   ह्या राज्यांत वट्ट 119 सुवातो आसात. सत्ता बीआरएस ह्या पक्षाची आसून मुख्यमंत्री के चंद्रशेखर राव आसात. हांगा घेतिल्ल्या अदमासा प्रमाण बीआरएस भोवमताचे लागीं वतलो अशें दिसून येता. सर्वसादारणपणान तांकां चडांत चड 55 सुवातो मेळटल्यो. तांचे फाटोफाट काँग्रेस पक्ष लेगीत 48 ते 60 सुवातो मेळयतलो अशें चित्र आसा. हाचोच अर्थ हांगा अटीतटीची लडत आसा. हांगा प्रस्तावितां आड लोक व्हड प्रमाणांत आसात. बीआरएस पक्षा आड लोकां मदीं व्हड प्रमाणांत असंतोष आसा. पूण हांगा भाजपाक व्हडलेशें जैत मेळचें ना. चडांत चड तांकां 10 ते 22 सुवातो मेळटल्यो असो अदमास सी व्होटराचो आसा.
4. छत्तीसगड
   हांगा काँग्रेस पक्ष सत्तेर आसून भुपेंद्र बघेल हे मुख्यमंत्री आसात. हांगासरली लडत भाजपा आनी काँग्रेस अशीच आसतली. दोनूय पक्षां मदीं नेटाची चुरस आसून भाजपा मात्शी वरचडूच दिसता. ज्यो येवजण्यो काँग्रेस पक्षान राबयल्यात ताचेर तांची भिस्त आसा. सेगीत बघेल सरकाराचेर टिका करीत आसा. हांगा 90 सुवातां मदल्यो भाजपाक चडांत चड 55 सुवातो मेळूंक शकता असो अदमास सी व्होटरांचो आसा. ताचे फाटोफाट काँग्रेस आसा.
5. मिझोरम
   हें राज्य ल्हान आसून हांगा 40 सुवातो आसात. हांगा एमएमएफ आनी काँग्रेस अशी नेटाची लडत आसा. हांगा भाजपाक व्हड अशा सुवातांची आशा ना.
   एकंदरीत अदमास पळयत जाल्यार भाजपाक राजस्थान, छत्तीसगड हांगा सत्तेर येवपाचें अनुकूल वातावरण आसा. तेलंगणांत नेटाची लडत अपेक्षीत आसा. जाल्यार काँग्रेस पक्षाक मध्य प्रदेशांत सत्तेर येवपाची शक्यताय चड आसा. मिझोरामांत नेटाची लडत जातली. अजून लेगीत वेंचणुकांक सुमार एका म्हयन्या परस चड काळ आसा. तो मेरेन मतदारांच्या मनांत कौल कोणा वटेन आसा हें मतपेटयांतल्यानूच दिसून येतलें. ह्या पांच राज्यांतल्या येसाचेरूच लोकसभेची वेंचणूक केन्ना जातली हाचो अदमास येतलो. ह्या पांच राज्यांच्यो वेंचणुको म्हणल्यारूच लोकसभेची रंगीत येसायूच अशेंच म्हणचें पडटलें.