भांगरभूंय | प्रतिनिधी
उत्तर प्रदेशांत ‘महानंदा’ सारको तरणाटो?
लखनौ, खबरां संस्था ः उत्तर प्रदेशांतल्या बरेलींत फाटले पांच म्हयने बायलांचे खून चालू आसा. पांच म्हयन्यांत णव बायलांची हत्या जाल्ल्यान वाठारांत भंय निर्माण जालां. विशेश म्हळ्यार ह्या सगळ्या बायलांची साडी वा ओडणीन गळो दाबून हत्या केलां. सगल्या बायलांची एकच तरेन हत्या जाता हे पळोवन खूनी मानसीक स्थिती इबाडिल्लो आसूं येता, असो दुबाव पुलिसांक आसा. गोंयांत कांय वर्सां पयलीं महानंद प्रकरण गाजिल्लें. तोय ओडणी वापरून चलयांक मारतालो.
नेमकें कितें घडटा?
बरेली शारांतल्या हत्यांची राज्यभर चर्चा सुरू आसा. हे खून चड करून बरेलीच्या शिशागढ आनी शाही आदी वाठारांनी घडल्यात. हालींच 55 वर्सां पिरायेचे बायलेचो खून जाल्ल्यान वाठारांत भंय निर्माण जाला.
खून जाल्ल्या बायलेचें नांव उर्मिला देवी गंगवार. आयतारा दनपारां ती जनावरांक तण हाडपाक भायर सरली. पूण दनपारां मेरेन ती परत घरां आयलीच ना. देखून तिचो घोव सोदपाक लागलो. घरां पसून कांय अंतराचेर ताका बायलेचीं मोडून पडल्लीं काकणां मेळ्ळीं. थंयच्यान कांय अंतराचेर उर्मिला देवीची कूड मेळ्ळी. तशेंच तिच्या तकलेचेर फाटीर कांय घाव तांका दिसलो.
५ म्हयने, ९ खून!
फाटल्या पांच म्हयन्यांत 9 खून जाल्ल्या प्रकरणाक लागून पुलिसांचो हुस्को आनीक वाडला. हे खून मध्यम पिरायेच्या ते जाण्टे बायलां मदीं घडत आसात. इतलेंच न्हय तर सगळे खून साडी वा ओडणीन गळो दाबून केल्यात.
खून करप्याची चवकशी करपा खातीर पुलिसांनी दोन पंगड तयार केल्यात. तातूंतलो एक पंगड प्रत्यक्ष खून आनी घडणुकेच्या सुवातेर चवकशी करतलो जाल्यार दुसरो पंगड सगल्या मेल्ल्या बायलां कडेन संबंदीत आशिल्ल्या व्यक्तींची चवकशी करतलो अशी म्हायती पुलिसांनी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
