पांच जाणांक जीवदान दिवपी बाय
भांगरभूंय | प्रतिनिधी
कोची : आलिन शेरीन अब्राहम (10 म्हयने) थारलें केरळांतलें सगल्यांत ल्हान अवयव दान करपी चली. कोट्टायमांत जाल्ल्या कार अपघातांत ताका मरण आयलें. उपरांत ताच्या आवय- बापायन ताचें अवयव दान करपाचो निर्णय घेतलो. ही म्हायती दितना मुख्यमंत्री पिनाराई विजयन हांणी सांगलें, दान केल्ले अवयव पांच जाणांक नवी जीण दितले.
अलिनाचे यकृत, दोन मुत्रपिंडां, काळजाची झडप आनी दोळे दान केले. सुरवेक हे अवयव हवाई मार्गान धाडपाची येवजण आशिल्ली. पूण रातच्या वेळार हेलिकॉप्टर वापरूंक मेळनाशिल्ल्यान तें रस्ते मार्गान धाडलें. पुलीस आनी भलायकी कर्मचाऱ्यांनी ‘ग्रीन कॉरिडोर’ तयार करुन येरादारी सुरळीत केली. कोट्टायम मेडिकल कॉलेजींत शवविश्लेशणाची खाशेली वेवस्था केल्ली, जाका लागून कूड कळाव करिनासतना तांच्या घरच्यांच्या ताब्यांत दिवपाक मेळटली.
दान केल्ल्या अवयवां मदले दोन अवयव पयलींच गंभीर अवस्थेंत आशिल्ल्या भुरग्यां मदीं प्रत्यारोपण केल्यात. तांची स्थिती आतां सुदारता अशें हॉस्पिटल प्रशासनान सांगलें.
हातूंत आस्पाव आशिल्ल्या भलायकी कर्मचाऱ्यांक, पुलीस आनी एम्ब्युलन्साच्या कर्मचाऱ्यांक मुख्यमंत्री विजयन हांणी परबीं दिली. आलीनाच्या आवय- बापायच्या ह्या निर्णयाची तांणी तोखणाय केली आनी हो निर्णय पुराय केरळा खातीर एक आदर्श आसा अशें म्हणलें. तांच्या दुख्खांत आमी वांटेकार आसात आनी आर्गा दिता अशेंय तांणी सांगलें.
मजगतीं, ज्येश्ठ अभिनेते मोहनलाल आनी कमल हसन हांणी अलिनाच्या पालकांक शाबासकी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
