भांगरभूंय | प्रतिनिधी
प्रभारी सी. टी. रवी हांच्या वक्तव्याक लागून राजकी मळार परतून खवदळ
भांगरभूंय । प्रतिनिधी
पणजी : हेर पक्षांचे पांच आमदार भाजपाच्या संपर्कांत आसात. केंद्रीय नेतृत्वान मान्यताय दिले उपरांत तांकां भाजपांत प्रवेश दितले. उपरांत गोंयांत भाजप आमदारांचो आंकडो 30 जातलो, असो गौप्यस्फोट भाजपाचे गोंयचे प्रभारी सी. टी. रवी हांणी केला.
पणजे भाजपाचे राज्य कार्यकारिणीची बसका जाली. बसकेच्या उक्तावणा उपरांत पत्रकारां कडेन उलयताना तांणी हें वक्तव्य केलें. तांच्या ह्या वक्तव्याक लागून राजकी मळार परतून खवदळ निर्माण जाला. भाजपाचे वीस आमदार आसात. ते भायर मगोच्या दोन आनी तीन अपक्षांचो सरकाराक तेंको आसा. हाका लागून सरकारा कडेन सध्या 25 आमदार आसात. हेर पक्षांचे 5 आमदार आयले उपरांत पक्षा कडेन 30 आमदार जातले. हे आमदार कोण आनी खंयच्या पक्षाचे ते बेगिनूच सगळ्यांक कळटले, अशें सी. टी. रवी हांणी सांगलें. भाजपाचे राज्य कार्यकारिणी बसकेच्या उक्तावणा उपरांत प्रभारी सी. टी. रवी हांचें भाशण जालें. विरोधक भारतीय जनता पक्ष तशेंच प्रधानमंत्री नरेंद्र मोदी हांचेर तथ्यहीन आरोप करतात. या आरोपांक भाजपा कार्यकर्त्यांनी बळी पडचें न्हय. भाजप सरकारा खातीर लोकशाय संकश्टांत आयल्या, असो आरोप जाता. काँग्रेस पक्षांत लोकशाय आसा काय? पंडीत जवाहरलाल नेहरू उपरांत सर्गेस्त इंदिरा गांधी प्रधानमंत्री जाल्यो. इंदिरा गांधी उपरांत राजीव गांधी प्रधानमंत्री जाले. आता सोनिया गांधी पक्षाच्यो फुडारी आसा. काँग्रेसींत लोकशाय ना, तर घराणेंशाय आसा. समाजवादी पक्षाची हीच गत आसा. मुलायमसिंग यादव हांचे उपरांत तांचो पूत अखिलेश यादव हे पक्षाचे फुडारी जाले. काश्मीरांत नॅशनल कॉन्फरन्स पक्षाचो ताबो अब्दुला कुटुंबा कडेन आसा. भाजपांत मात अशी स्थिती ना. घराणेंशाय नाशिल्ल्यान नरेंद्र मोदी हे प्रधानमंत्री जाले. अमित शाह उपरांत जे. पी. नड्डा हे राष्ट्रीय अध्यक्ष जाले. घराण्याक लागून न्हय जाल्यार वावर करून भाजपांत सगळे फुडारी वयर पावल्या, अशें सी टी रवी हांणी सांगलें.
भाजप लोकशायेचो आदर करिना : काँग्रेस
भोवमत मेळून लेगीत विरोधी पक्षांचे आमदार फोडपाचो भाजपाचो वावर चालूच आसा. भाजप हो लोकशायेचो आदर करिना, अशें प्रद्रेश काँग्रेस अध्यक्ष अमीत पाटकार हांणी म्हणलां. वीस आमदार आसून लेगीत विरोधी पक्षांचे आमदार फोडपाचो यत्न निशेध करपा सारको आसा. भाजपाक आमदारांचेर विस्वास ना, हे खातीर ते विरोधी पक्षांचे आमदार फोडपाचे यत्न करतात, अशें पाटकार हांणी म्हणलां. फाटले वेंचणुकेंत भोवमत नासतना लेगीत विरोधी आमदार फोडून भाजपान सरकार घडयलें. हे खेपे भोवमत आसतना लेगीत आमदार फोडपाचे तांचे यत्न चालूच आसात, अशेंय तांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
