भांगरभूंय | प्रतिनिधी
(आदल्यान चालू…)
हालींसराक तियात्रांनी दाखयतात तो एक नग (आयटम) ‘सायड-शो’-चो पांचको वो हांसोवपाचो तमासो, हें समजापाक कुस्तार जाता. एकलो करता म्हूण दुसरो करता आनी मागीर तिसरो, चवथो… हें तियात्रांनी फुडें चालूच आसता. तियात्रांत विनोद करतलीं पात्रां हो नग करतात- कांतारांची वा नाचपाची स्पर्धा म्हणून करतात. खोलायेन नियाळ्ळ्यार असलो नग चड फावटी तियात्रांचो दर्जो एका तमाशाच्या दर्ज्यार हाडटा म्हण सांगपाक कांयच हरकत ना. लोक मागीर पोट फुटसर हांसलो वो वसऱ्यात हांश्याचो खळखळ जालो, ती गजाल वेगळी. प्रेक्षकांचो तसल्याक प्रतिसाद मेळटा म्हण घडये सगट दिग्दर्शक आपआपल्या तियात्रांनी तसलो नग आस्पावन घेतात आसत. पूण हातूंत तियात्राचो दर्जो वयर उरता जायत? तातूंत गावपा परस अदीक फुंकेसवाय हावभाव आसतात. असल्या नगाक लागून प्रेक्षकांक मान खाला घालूंक पडटा आनी थोड्यांनी तियात्राक वचपाचेंच सोडून दिलां, मागीर तांकां फुकट तिकेट पाठय वा अमूक तियात्र बरो म्हण आपय. फरक पडना.
म्हणटकच आदले तरेचें तियात्रांतलें जिरें-मिरें तियात्र पळेणारांक आयच्या तियात्रांनी मेळना म्हणटात. तें हें जावं येता. हाचेर बारीकसाणीन समिक्षा करून निटायेचीं पावलां मारूंक आयज ’तियात्र अकादेमी ऑफ गोवा’ (टीएजी) असली सरकारी संस्था आसा. पूण गंभीरतायेन आनी जबाबदारेन हें काम टीएजी करता जायत? वो असलें काम हाताळपी जबाबदारीचे आनी कोपशीचे मनीस तांचे कडेन आसत काय? ‘वेव्हारीक तियात्रां विशीं टीएजी-च्यान कांयच करूंक जायना’, म्हणलें की हिशोब मेकळो? खूब करूंक जाता आनी आपल्याक जाय जाल्यार खूब – खूब करतातूय बी. तें मागीर कलेचें सोडून आपल्या सुवार्थाचें जालें म्हण तांचे वयर आशिल्यांकूय कांय फरक पडना. पूण लुकसाण तियात्र कलेक.
आदल्या तियात्रांनी चवके, पांचके, सवके-सातके , एक- एकूच नग आसतालो जायत. पूण ते नग ‘पयशे वसूल’ नग आसताले. खूब हिकमतीन रचिल्ले आनी जबरदस्त तरेन सादरीकरण केल्ले. म्हज्या उगडासांत ट्रीओ धरून चवके, पांचके, सवके आनी सातके गंभीरतायेचे, राजकी आनी विनोदाचे नग हांवें पळयल्यात आनी तांकां परत-परत आपोवंक हेर प्रेक्षकां सांगाता व्हडल्यान फिओण्यो घाल्यात. तेन्नाचे आसले आकर्शीत कांतारांचे नग रचपांत फिशाळ वर्तले सौजा फेर्राव, यंग मेनेझिस, एम दोद दे वेर्णा, नेल्सन आफोन्सो, रोम टॉनी उपरांत सौजा बॉय आदी. त्या काळार आनीक एक अडचण आसताली. चेडवां वो अस्तु-यो पालकार नासल्यो. आनी दादलेच अस्तुरेचीं सवंगां करताले. कांय दादले अस्तुरेचो ताळोच न्हय तर निजाचे अस्तुरे परीं मोडप – मिरोवप करताले. रोम टॉनी सदांच म्हणटालो, “सोलो, ड्यूएट, टीओ रचूंक सोंपे, पूण चवके ते सातके म्हुणलें की जोर सुडट्टा, ते रचपाक विशय सोडूच, पूण पालकार जावंक फावो त्या सादारीकरणाचेर मन लावन ते घडचें पडटात. तसलेच कलाकार जाय पडटात. तांच्यो खूब येंसायो मारच्यो पडटात… ”
आतां हांव सांगतां की एक गजाल, ती आतांचे पिळगेन तर पळोवंक ना जाल्यार तसल्या काणयांचो कितें फायदो? हांगा तियात्र अकादेमी ऑफ गोवा ह्या असल्या संस्थांचें कार्य सुरूं जाता. “हे नग ‘फोर्मेटांत’ आसूंक जाय, ‘इन्टरैक्टीव’ आसूंक जाय,” म्हणून नेम केले म्हण जायना. ह्या फिशाळ रचप्यांचीं असल्या तरेचीं कांतारां रिकॉर्डींग केल्लीं उपलब्द आसात म्हणटच तांचीं उतरां मेळटात. रोम टॉनीच्या धुवांनी, फेल्सी आनी आपलोन, हांणी एक बरें काम केलां. तांणी रोम टॉनी-च्या कांतारांच्यो विसिडी तयार केल्यात. तांचेर अभ्यास जावंक जाय. हें करूंक कार्यशाळा घडोवन हाडूंक जाय. तें रचप जाणून घेवंक जाय. आनी तसलें रचपाची कला आतांच्या पिळगेन आपणावंक जाय…
(मुखार चलता)
लिप्यांतर – विशाल खांडेपारकार, 8080622370
फाऊस्तो वि. दा. काॅस्ता
9821228684
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
